អន្តរជាតិ
អូស្ដ្រាលីព្យាយាមស្ដារមិត្តភាពជាមួយបារាំង ខណៈក្រុមហ៊ុនបារាំងនឹងទារសំណងរឿងបញ្ចប់កុងត្រា នាយករដ្ឋមន្រ្តីអូស្ត្រាលី ស្កុត ម៉ូរីសុន ។ រូបថត AFP
× នាយករដ្ឋមន្ត្រីអូស្ត្រាលី ស្កុត ម៉ូរីសុន នៅថ្ងៃទី២២ ខែកញ្ញា ប្រកាសថា លោកបានព្យាយាមរៀបចំកិច្ចសន្ទនាមួយជាមួយប្រធានាធិបតីបារាំង អេម៉ានុយអែល ម៉ាក្រុង ដើម្បីជជែកពីបញ្ហាទ្វេភាគីដែលប្រេះស្រាំក្រោយការប្រកាសគម្រោងសាងសង់នាវាមុជទឹក ប៉ុន្តែមិនបានជោគជ័យឡើយ។ ប្រមុខរដ្ឋាភិបាលអូស្ត្រាលីរូបនេះ នឹងប្រឹងភ្ជាប់ទំនាក់ទំនងឡើងវិញជាមួយបារាំង ខណៈក្រុមហ៊ុនបារាំងត្រៀមទារសំណងពីអូស្ត្រាលីដែលលុបចោលកិច្ចព្រៀងសាងសង់នាវាមុជទឹក។
អស់រយៈពេលជាងមួយសប្តាហ៍បន្ទាប់ពីប្រកាសគម្រោងសាងសង់នាវាមុជទឹកដើរដោយថាមពលនុយក្លេអ៊ែរក្រោមសម្ព័ន្ធភាពថ្មីអូស្ត្រាលី-អង់គ្លេស-អាម៉េរិក បារាំងហាក់ដូចជានៅគុំកួនអូស្ត្រាលីខ្លាំងនៅឡើយ។ ចំពោះអាម៉េរិក បន្ទាប់ពីជំនួបរវាងលោក ចូ បៃឌិន និងសមភាគីបារាំង អេម៉ានុយអែល ម៉ាក្រុង បារាំងក៏យល់ព្រមអនុញ្ញាតឱ្យអគ្គរដ្ឋទូតរបស់ខ្លួនត្រលប់ទៅទីក្រុងវ៉ាស៊ីនតោនវិញនៅសប្ដាហ៍ក្រោយ។ ប៉ុន្តែចំពោះអូស្ត្រាលី សូម្បីតែការរៀបចំកិច្ចសន្ទានាជាមួយបារាំងក៏មិនទាន់ទៅមុខរួចដែរ។
«ឱកាសសម្រាប់ការជួបគ្នាជាមួយភាគីបារាំងមិនទាន់មាននៅឡើយទេ។ ប៉ុន្តែយើងនឹងអត់ធ្មត់»។ លោក ស្កុត ម៉ូរីសុន បានលើកឡើងបែបនេះ បន្ទាប់ពីជួបជាមួយសមាជិកសភា អាម៉េរិកដើម្បីពិភាក្សាពីកិច្ចព្រមព្រៀងនាវាមុជទឹក និងសម្ព័ន្ធភាពសន្តិសុខថ្មី។ នាយករដ្ឋមន្ត្រីរូបនេះបញ្ជាក់ថា លោកយល់ពីការខកចិត្តជាខ្លាំងរបស់បារាំង ហើយលោកនឹងចំណាយពេលបន្ថែមទៀត ព្រមទាំងទន្ទឹងរង់ចាំឱកាស និងពេលវេលាស័ក្តិសមដើម្បីដោះស្រាយរឿងនេះ។
បើតាមលោក ម៉ូរីសុន បញ្ហារវាងបារាំង-អាម៉េរិកមានលក្ខណៈខុសគ្នាជាមួយបញ្ហារវាងបារាំង-អូស្ដ្រាលី។ នេះមានន័យថា ការផ្សះផ្សាទំនាក់ទំនងបារាំង-អូស្ដ្រាលីពិបាកជាងការផ្សះផ្សាទំនាក់ទំនងបារាំង-អាម៉េរិក។
ក្នុងថ្ងៃទី២២ ខែកញ្ញា ក្រុមហ៊ុនសាងសង់នាវាបារាំង Naval Group ដែលចុះហត្ថលេខាលើកិច្ចព្រមព្រៀងសាងសង់នាវាមុជទឹកប្រើថាមពលឥន្ធនៈឱ្យអូស្ត្រាលីនោះ ប្រកាសថា ខ្លួននឹងផ្ញើបញ្ជីទូទាត់ប្រាក់ទៅអូស្ត្រាលីក្នុងរយៈពេលប៉ុន្មានសប្តាហ៍ខាងមុខ ហើយក៏រំពឹងថា ទីក្រុងកង់បេរ៉ានឹងបង់ប្រាក់សម្រាប់ការលុបកិច្ចសន្យាទិញនាវាមុជទឹករបស់ខ្លួនតម្លៃរាប់ពាន់លានដុល្លារផងដែរ។
«អូស្ត្រាលីជាអ្នកបញ្ចប់កិច្ចសន្យា ដូចច្នេះពួកយើងមិនមែនជាអ្នកខុសនោះទេ។ នាយកប្រតិបត្តិក្រុមហ៊ុន Naval Group លោក Pierre Eric Pommellet ប្រាប់កាសែតបារាំង Le Figaro បែបនេះ។
គួរបញ្ជាក់ថា អ្នកនយោបាយអូស្ត្រាលីបានបង្ហាញពីរបាយការណ៍ស្ដីពីការពន្យារពេល ការចំណាយហួសកំណត់ និងបញ្ហាផ្សេងៗនៃការសាងសង់នាវាមុជទឹកដោយក្រុមហ៊ុនបារាំងខាងលើ។ ការណ៍នេះហើយដែលអូស្រ្តាលីសម្រេចចិត្តលុបចោលកិច្ចព្រមព្រៀងជាមួយបារាំង ហើយងាកទៅរកបច្ចេកវិទ្យាទំនើបរបស់អាម៉េរិកវិញ៕
© រក្សាសិទ្ធិដោយ thmeythmey.com