អគ្គរដ្ឋទូតអាម៉េរិកប្រចាំនៅ UN លោកស្រី Linda Thomas-Greenfield បានប្រកាសក្នុង កិច្ចប្រជុំតាមប្រព័ន្ធអនឡាញមួយថា អាម៉េរិកនឹងផ្ដល់ជំនួយប្រមាណ១៨០លានដុល្លារសម្រាប់ការ ដោះស្រាយវិបត្តិជនភៀសខ្លួនរ៉ូហ៊ីងយ៉ានៅបង់ក្លាដែស។

 

ជាមួយនឹងជំនួយថ្មីនេះ ទីភ្នាក់ងារអាម៉េរិកសម្រាប់ការអភិវឌ្ឍអន្តរជាតិ (USAID) នឹងអាចបន្តផ្តល់ជំនួយស្បៀងអាហារ សេវាកម្មថែទាំសុខភាព សុវត្ថិភាព សេវាកម្ម អនាម័យ ការសាងសង់ជម្រក និងប្រព័ន្ធទឹកស្អាតដល់ជនភៀសខ្លួនដែលស្នាក់នៅជំរំ Kutupalong ។ ជំរំនេះស្ថិតនៅក្រុង Cox's Bazar របស់បង់ក្លាដែស និងជាជម្រកធំជាងគេបង្អស់លើពិភពលោកដែលទទួលយកជនភៀសខ្លួនរ៉ូហ៊ីងយ៉ាជាង៨០ម៉ឺននាក់។

 

ជាមួយគ្នានេះអ្នកនាំពាក្យក្រសួងការបរទេសលោក Ned Price បានលើកឡើងក្នុងសេចក្តីប្រកាសព័ត៌មានមួយថា ជាមួយនឹងប្រាក់ឧបត្ថម្ភថ្មីនេះ ជំនួយមនុស្សធម៌សរុបរបស់អាម៉េរិកឈានដល់ជាង១,៥ពាន់លានដុល្លារបើគិតចាប់តាំងពីខែសីហាឆ្នាំ២០១៧ ។ ឆ្នាំ២០១៧ ជាពេលដែលជនភាគតិចរ៉ូហ៊ីងយ៉ារាប់ម៉ឺននាក់បានរត់ចេញពីប្រទេសទៅកាន់បង់ក្លាដែស និងប្រទេសផ្សេងៗទៀតដើម្បីគេចខ្លួនពីអំពើហិង្សារបស់ក្រុមយោធាមីយ៉ាន់ម៉ា។

 

ក្នុងសេចក្តីប្រកាសព័ត៌មានខាងលើ លោក Price ជាថ្មីម្ដងទៀតបានសង្កត់ធ្ងន់ឱ្យមេដឹកនាំយោធាមីយ៉ាន់ម៉ា ត្រូវតែបញ្ឈប់អំពើហិង្សាជាបន្ទាន់ ដោះលែងអ្នកដែលជាប់ឃុំឃាំងដោយអយុត្តិធម៌ ស្តាររបបនយោបាយឡើងវិញតាមលទ្ធិប្រជាធិបតេយ្យ និងអនុវត្តផែនការ៥ចំណុចរបស់អាស៊ាន។ លោក Price ក៏បានទទូចឱ្យរបបនេះអនុញ្ញាតឱ្យមាន ការផ្ដល់ជំនួយមនុស្សធម៌ជាបន្ទាន់ និងដោយគ្មានឧបសគ្គដល់ប្រជាជនដែលត្រូវការជំនួយផងដែរ៕