លោក សុខ ទូច សរសេរថា៖«ជាក់ស្ដែង យើងត្រូវពិនិត្យមើលប្រវត្តិសាស្ត្រ។ ខ្មែរ ពឹងអ្នកជិតខាង ខ្មែរបាត់ទឹកដី។ ខ្មែរ ត្រូវបានមហាអំណាចជួយនៅថ្ងៃទី១៧ ខែមេសា ឆ្នាំ១៩៧៥ គឺជាមេរៀន។ ខ្មែរ ទៅពឹងបារាំងឆ្នាំ១៨៥៩ ដល់ឆ្នាំ១៩៥៤ ខ្មែរបាត់កូសាំងស៊ីន (កម្ពុជាក្រោម)»។ 

 

លោក មិនត្រឹមតែលើកឡើងពីប្រវត្តិសាស្រ្តខ្មែរ ដែលខ្មែរ ធ្លាប់បាត់បង់ទឹកដី និងធ្លាប់ធ្លាក់ក្នុងភ្នក់ភ្លើងសង្គ្រាម ដោយសារការពឹងបរទេសនោះទេ លោក ក៏បានរំលេចពីប្រវត្តិសាស្រ្តរបស់បរទេសដែរ ដែលរងគ្រោះដោយសារការពឹងបរទេស នោះគឺស្ថានការណ៍នៅអាហ្វហ្កានីស្ថាន កាលពីឆ្នាំ១៩៩៦ និងស្ថានការណ៍បច្ចុប្បន្ននៅអាហ្វហ្កានីស្ថាន ក្នុងឆ្នាំ២០២១នេះ។ លោក ចាត់ទុក ស្ថានការណ៍នៅអាហ្វហ្កានីស្ថានទាំង២ដំណាក់កាលនេះ ថាសុទ្ធតែជាមេរៀន។ 

 

តាមរយៈប្រវត្តិសាស្រ្តទាំងនេះ ប្រធានរាជបណ្ឌិត្យសភាកម្ពុជា មិនចង់ឲ្យអ្នកនយោបាយខ្មែរបច្ចុប្បន្ន បន្តដើរជាន់ដានចាស់ឡើយ។ លោក សំដៅទៅអ្នកនយោបាយថា៖«សូមអ្នកនយោបាយកុំដើរពឹងពាក់បរទេស ដើម្បីតែបុព្វហេតុមហិច្ឆតាអំណាចរបស់ខ្លួន ហើយបណ្ដោយឲ្យប្រទេសជាតិធ្លាក់រងគ្រោះ ប្រជាជនជាអ្នកទទួលរងទុក្ខលំបាក»។

 

លោក យល់ឃើញថា មុននឹងទៅពឹងបរទេសឲ្យជួយ ខ្មែរ ត្រូវជួយខ្លួនឯងសិន។ លោក បន្តថា គ្មាននរណាជួយខ្មែរឡើយ បើខ្មែរ ខ្វះសមត្ថភាព៕