អគ្គរដ្ឋទូតមីយ៉ាន់ម៉ាប្រចាំ UN បច្ចុប្បន្ន លោក Kyaw Moe Tun ដែលត្រូវបានតែងតាំងដោយរដ្ឋាភិបាលជាប់ឆ្នោត ត្រូវបានគេរំពឹងថា នឹងថ្លែងទៅកាន់មហាសន្និបាត UN នាថ្ងៃទី ២៧ ខែកញ្ញាដែលជាថ្ងៃចុងក្រោយនៃកិច្ចប្រជុំ។ ប៉ុន្តែនៅថ្ងៃទី២៤ ខែកញ្ញា អ្នកនាំពាក្យ UN លោក Stephane Dujarric បានអះអាងថា តំណាងមីយ៉ាន់ម៉ារូបនេះ នឹងមិនថ្លែងក្នុងកិច្ចប្រជុំឡើយ ដែលនេះជាលទ្ធផលនៃការជជែករបស់គណៈកម្មាធិការសារតាំងរបស់ UN ។ 

 

លោក Dujarric បញ្ជាក់ថា ចិន រុស្ស៊ី និងអាម៉េរិកដែលជាសមាជិកគណៈកម្មាធិការ បានឈានដល់ការយោគយល់គ្នាមួយ ដោយក្នុងនោះទីក្រុងមូស្គូ និងទីក្រុងប៉េកាំង នឹងមិនជំទាស់នឹងលោក Kyaw Moe Tun ក្នុងការបន្តតំណែងរបស់លោកឡើយ ប្រសិនបើលោកនឹងមិនថ្លែងក្នុងមហាសន្និបាត។ ការសម្រេចបែបនេះ ត្រូវបានមើលឃើញ ជាបរាជ័យរបស់ក្រុមយោធាដែលចង់អង្គុយកៅអីតំណាងមីយ៉ាន់ម៉ានៅស្ថាប័នអន្តរជាតិ។

 

លោក Kyaw Moe Tun ប្រាប់ទីភ្នាក់ងារព័ត៌មាន Reuters ថា លោកបបានដកខ្លួន ចេញពីបញ្ជីថ្លែងសុន្ទរកថា ហើយនឹងមិនថ្លែងនៅក្នុងកិច្ចពិភាក្សាទូទៅនេះទេ។ លោកបានបន្ថែមថា លោកបានដឹងច្បាស់ពីការយោគយល់គ្នារវាងសមាជិកគណៈកម្មាធិការខាងលើ។

កន្លងមក របបយោធាមីយ៉ាន់ម៉ាបានបញ្ជូនឈ្មោះលោក  Aung Thurein  ឱ្យធ្វើជាប្រេសិតប្រចាំ UN ជំនួសលោក Kyaw Moe Tun ។

 

រីឯអាហ្វហ្កានីស្ថានឯណោះ អគ្គរដ្ឋទូត Ghulam M. Isaczai នៃរដ្ឋាភិបាលដែលត្រូវបាន តាលីបង់ផ្ដួលរលំ អាចនឹងថ្លែងតំណាងឱ្យប្រទេស។ លោក Dujarric បានអះអាងថា ៖ «នៅពេលនេះ តំណាងអាហ្វហ្កានីស្ថានដែលបានចុះក្នុងបញ្ជីសម្រាប់ការថ្លែងនៅថ្ងៃទី ២៧ ខែកញ្ញាជាលោក  Ghulam M. Isaczai»។

 

កាលពីថ្ងៃទី២០ ខែកញ្ញារដ្ឋមន្ត្រីការបរទេសនៃរដ្ឋាភិបាលបណ្ដោះអាសន្នរបស់តាលីបង់ បានបញ្ជូនឈ្មោះអ្នកនាំពាក្យលោក Suhail Shaheen ឱ្យប្រជែងយកតំណែងអគ្គរដ្ឋទូតនៅ UN ។ យ៉ាងណាមិញ មកទល់ពេលនេះគណៈ កម្មាធិការមិនទាន់បានជួបពិភាក្សាគ្នានៅឡើយ។
 

យោងតាមច្បាប់របស់មហាសន្និបាត ប្រសិនបើគណៈកម្មាធិការទាំង៩មិនទាន់សម្រេចចិត្តជាផ្លូវការ លោក Kyaw Moe Tun  និងលោក Isaczai នៅតែជាតំណាងស្របច្បាប់នៃប្រទេសទាំងពីរ៕