យុវជនចាម្ប៍មួយក្រុម បានរៀបចំព្រឹត្តិការណ៍តាំងបង្ហាញនំចាម្ប៍ នាទិវានំប្រពៃណីចាម្ប៍ លើកដំបូងបង្អស់នៅកម្ពុជា ក្នុងគោលបំណងផ្សព្វផ្សាយពីវប្បធម៌ ទំនៀមទម្លាប់ ប្រពៃណី ជាពិសេសគឺការតាំងបង្ហាញនំ ជាអត្តសញ្ញាណជនជាតិចាម្ប៍។ ទិវានេះ ត្រូវបានរៀបចំឡើងនារសៀលថ្ងៃទី០៤ ខែធ្នូ ឆ្នាំ២០២១ នៅសារមន្ទីរខ្លែងខ្មែរ ក្រោមការអនុញ្ញាតគាំទ្រពីក្រសួងវប្បធម៌ និងវិចិត្រសិល្បៈ។

 

ថ្លែងប្រាប់សារព័ត៌មានថ្មីៗ២៥ នាទិវានំចាម្ប៍ កញ្ញា អឹមហ្សឹត ហ្វារ៉ាឌិស៏ ជាតំណាងយុវជនចាម្ប៍រៀបចំកម្មវិធី បញ្ជាក់ថា «ទិវានំប្រពៃណីចាម្ប៍» ប្រារព្ធឡើងក្នុងគោលបំណង ដើម្បីរឹតចំណងមិត្តភាពរវាងជនជាតិចាម្ប៍ ខ្មែរ និងជនជាតិដទៃទៀត។ គោលបំណងចម្បងមួយទៀត គឺការផ្សព្វផ្សាយពីវប្បធម៌ ទំនៀមទម្លាប់ ប្រពៃណីចាម្ប៍។ ជាពិសេសការតាំងបង្ហាញ «នំប៉ាក់» ដែលជាអត្តសញ្ញាណមួយរបស់ជនជាតិចាម្ប៍។
 

«នេះជាកម្មវិធីលើកទីមួយ ដែលយើងធ្វើឡើង ហើយពិតជារំភើបមែនទែន ព្រោះយើងអត់បានដែលបង្ហាញវប្បធម៌ បងប្អូន ឬអ្នកផ្សេងបានស្គាល់។ គោលបំណងថ្ងៃនេះ យើងចង់ធ្វើនំចាម្ប៍ គឺដើម្បីឱ្យមហាជន គាត់បានដឹង ថានេះជានំរបសចាម្ប៍ ដែលមានតាំងពីយូរជំនាន់មក»។​ នេះជាសម្ដីរបស់ កញ្ញា ហ្វារ៉ាឌិស៏។

 

ក្នុងកម្មវិធីប្រព្រឹត្តទៅរយៈពេល២ម៉ោងកន្លះនេះ បានដាក់តាំងបង្ហាញនូវនំចាម្ប៍ចំនួនបីមុខផងដែរ រួមមាននំប៉ាក់, នំតាបៃជាល, និងនំលឺទ្រាំ។ ពាក់ព័ន្ធនឹងនំ ដែលយកមកដាក់តាំងបង្ហាញនាទិវានេះ លោក ឡឹប កើ ជាអ្នកចូលរួមផលិតកម្មវិធីនេះ លើកឡើងថា ប្រភេទនំខាងលើនេះ ភាគច្រើន ធ្វើឡើងក្នុងពិធី អបអរ ពិធីមង្គលផ្សេងៗ និងថ្ងៃសប្បាយៗជាដើម។

 

លោក ឡឹប កើ បន្ថែមដូច្នេះ៖ «នំនេះ ធ្វើក្នុងកម្មវិធីអ្វីក៏បាន ឱ្យតែជាកម្មវិធីសប្បាយៗ កម្មវិធីមានសំណាង ដូចជាឡើងផ្ទះ រៀបការ ខួបកំណើត។ ក្រោយៗនេះ ដូចជាឃើញមានអ្នកប្រឡងជាប់ ការងារអី ទៅក៏គេធ្វើដែរ»។ បើតាមលោក ឡឹប កើ បច្ចុប្បន្ន នំចាម្ប៍ដែលយកមកបង្ហាញនេះ ត្រូវបានផលិតដោយដៃសុទ្ធសាធ ហើយបច្ចុប្បន្នគេឃើញមានវត្តមាន តាមសហគមន៍ជនជាតិចាម្ប៍មួយចំនួនប៉ុណ្ណោះ ដូចជាខេត្តកំពង់ឆ្នាំង ខេត្តពោធិ៍សាត់ និងខេត្តបាត់ដំបង។

 

ក្រៅពីការដាក់តាំងបង្ហាញនំប្រពៃណី ក្នុងកម្មវិធីនេះ ក៏ឃើញមានការប្រគំភ្លេង ដើម្បីដង្ហែផងដែរ។ ភ្លេងប្រគំនេះ ត្រូវបានគេហៅថា «រ៉ាបាណា» ដែលអ្នកចូលរួមដង្ហែ វាយស្គរផង និងច្រៀងផង។ លោក សាន់ អ៊ីស្មាអែល ជាអ្នកដឹកនាំប្រគំភ្លេង ពន្យល់ថា ភ្លេងរ៉ាបាណានេះ ជាភ្លេងប្រពៃណីមួយរបស់ជនជាតិចាម្ប៍ តែងប្រារព្ធឡើង នៅពេលមានកម្មវិធីបុណ្យម៉ាលុត ពិធីរៀបមង្គលការ ពិធីចូលសាសន៍ និងពិធីសប្បាយៗផ្សេងទៀត៕