ពីនេះ ពីនោះ
«មច្ឆរី» មានន័យថា មនុស្សកំណាញ់ រីឯ «មច្ឆរិយ» គឺ សេចក្តីកំណាញ់
× មច្ឆរី [អានថា ម័ច-ឆៈរ៉ី] ចេញពីភាសាបាលី-សំសង្ក្រឹត ដែលមានន័យថា អ្នកកំណាញ់, មនុស្សកំណាញ់; បើស្រ្តីជា មច្ឆរិនី។
តាមវចនានុក្រមសម្តេចព្រះសង្ឃរាជ ជួន ណាត ពាក្យនេះ ត្រូវបានប្រើប្រាស់ភាគច្រើនក្នុងកំណាព្យ។ ឧទាហរណ៍៖ រីឯសេដ្ឋី ជាមច្ឆរី ល្បីថាកំណាញ់ ថ្ងៃមួយគាត់នឹក ចង់ស៊ីនំឆ្ងាញ់ ព្រោះក្ដីកំណាញ់ ពួនស៊ីក្នុងផ្ទះ ។ ព្រះមោគ្គល្លាន ប្រើឫទ្ធិ៍ផ្លូវឈាន ដែលមានជ្រៅជ្រះ ទៅបិណ្ឌបាត ឈរជិតខាងផ្ទះ ឲ្យសេដ្ឋីលះ ក្ដីទ្រឹស្ដិ៍ស្មូរបាន ។ ( រឿងកោសិយសេដ្ឋីកំណាញ់ស្វិតស្វាញ ) ។
ពាក្យពាក់ព័ន្ធផ្សេងទៀត មានដូចជា មច្ឆរិយ ឬមច្ឆេរិយៈ ដែលមានន័យថា សេចក្តីកំណាញ់។ កុលមច្ឆរិយៈសំដៅលើសេចក្តីកំណាញ់ត្រកូល គឺការមិនចង់ឲ្យអ្នកដទៃ ចូលទៅមកប្រាស្រ័យទាក់ទងរាប់អានត្រកូលរបស់ខ្លួន ។ មច្ឆេរចិត្ត គឺចិត្តកំណាញ់ ដែលផ្ទុយនឹងពាក្យ សទ្ធាចិត្ត ៕
© រក្សាសិទ្ធិដោយ thmeythmey.com