បទសមាស ជាមួយ​នឹង​សព្ទ «រង្គ» មានដូចជា រង្គភូមិ ( រង់-គៈភូម ) ដែលមានន័យថា ទីលេងមហោស្រព; សមរភូមិ ( ទីចម្បាំង ) ។ រង្គសាល ឬ រង្គសាលា ( រង់គៈ—  ) រោងរាំ, រោងល្ខោន ។ល។ នេះ​បើតាមការពន្យល់​ក្នុង​វចនានុក្រម។ រោងកុន រោងធំទូលាយសម្រាប់លេងកុន ក៏មានន័យស្មើ រង្គសាល ផងដែរ ។ រោងក្រសាល រោងសម្រាប់ទទួលភ្ញៀវ, សម្រាប់អង្គុយលំហែតាមសប្បាយ ( ហៅ រោងត្រសាល ក៏មាន ) ។

 

បច្ចុប្បន្នពាក្យ​ «រង្គសាល» មានន័យ​ទូលំទូលាយជាងនេះ ពោល​គឺមិនត្រឹមតែ​រោង​រាំ ឬ រោងល្ខោននោះឡើយ។ វាជាកន្លែង​បម្រើ​ការ​សប្បាយ​ដូចជា ក្លឹបកម្សាន្ត ខារ៉ាអូខេ ឌីស្កូតែក និង​បៀរហ្គាឌិន យ៉ាងដូច្នោះដែរ។ 

 

រីឯ «រង្គាជីព» ចេញពីពាក្យ​ «រង្គ» បូកនឹង «អាជីវ» ដែលមានន័យថា អ្នកចិញ្ចឹមជីវិតដោយការលេងមហោស្រព ( អ្នករាំ, តួល្ខោន ); អ្នកចិញ្ចឹមជីវិតដោយការផាត់ថ្នាំ ( ជាងលាបថ្នាំ, ជាងគំនូរ)៕