សារព័ត៌មានថ្មីៗ នឹងលើកយកព្រឹត្តិការណ៍កសិកម្មសំខាន់ៗប្រចាំឆ្នាំ ២០២១ចំនួន៤ ដូចជា ចិន​អនុញ្ញាត​​ឲ្យ​​កម្ពុជា​នាំ​​ចេញ​​ស្វាយ​​ស្រស់​ទៅ​​ប្រទេស​​ខ្លួន​ ។ ចំណែកមៀនប៉ៃលិនគ្មានទីផ្សារ និងមានតម្លៃថោកដោយសារថៃបិទមិនឲ្យនាំចូល ខណៈជ្រូកកកស្ទះ និងលក់បានថោក និងស្រូវថោកគ្មានទីផ្សារ។  

 

 

រដ្ឋាភិបាលចិន កាលពីថ្ងៃទី២៦មេសា បានអនុញ្ញាតឲ្យកម្ពុជាអាចនាំផ្លែស្វាយស្រស់ប្រមាណ ៥០ម៉ឺនតោន ទៅកាន់ទីផ្សាររបស់ខ្លួនជារៀងរាល់ឆ្នាំ។ ក្រោយការចរចាទីផ្សារអស់រយៈពេល៣ឆ្នាំ ទីបំផុតចិនបានអនុម័តទទួលស្គាល់ជាផ្លូវការនូវបញ្ជីឈ្មោះចម្ការស្វាយចំនួន៣៧ និងរោងចក្រវេចខ្ចប់ចំនួន៥ ដែលអាចមានសិទ្ធិនាំចេញផ្លែស្វាយ ទៅកាន់ប្រទេសមហាអំណាចសេដ្ឋកិច្ចមួយនេះបាន។ 

 

ផ្លែ​ស្វាយ ដែលអាចនាំចេញទៅទីផ្សារចិនបាន គឺត្រូវឆ្លងកាត់ការវាយតម្លៃលើហេដ្ឋារចនាសម្ព័ន្ធមួយចំនួនដូចជា ការ​ធ្វើ​ប្រព្រឹត្តិកម្ម​សម្លាប់សមាសភាពចង្រៃ​​ ដោយ​​ប្រើ​​ចំហាយ​​ទឹកក្តៅ​ (Vapor Heat Treatment - VHT) ​ឬ​ ​ប្រព្រឹត្តិកម្ម​​ទឹក​ក្តៅ​ (Hot Water Treatment - HWT) ស្របតាមលក្ខខណ្ឌតម្រូវភូតគាមអនាម័យ។ 

 

ផ្លែស្វាយស្រស់របស់កម្ពុជា គឺជាកសិផលទី២ បន្ទាប់ពីផ្លែចេកដែលបានអនុញ្ញាតនាំចេញទៅកាន់ប្រទេសចិន កាលពីឆ្នាំ២០២០។ មិនតែប៉ុណ្ណោះ ផលិតផលកសិកម្មកម្ពុជា ៤មុខទៀត ត្រូវបានភាគីចិនអនុញ្ញាតឲ្យនាំចេញដោយផ្ទាល់ដូចជា អង្ករ ចំណិតដំឡូងមីក្រៀម ស្វាយចន្ទី និងចុងអង្ករ។ ថ្មីៗនេះ ភាគីចិនក៏កំពុងសិក្សា និងវិភាគហានិភ័យលើផ្លែមៀន និងត្រីប្រារបស់កម្ពុជា ដើម្បីឈានដល់ការសម្រេចនាំចេញ ដោយផ្ទាល់នៅក្នុងរយៈពេលដ៏ខ្លីខាងមុខ។ 

រយៈពេល១១ខែក្នុងឆ្នាំ២០២១នេះ​​ កម្ពុជាបាននាំចេញផ្លែស្វាយស្រស់ទៅក្រៅប្រទេសសរុបជាង២២ម៉ឺនតោន​ ក្នុងនោះចិនមានចំនួន៦៣៨១៤តោន។ នេះបើតាមរបាយការណ៍ប្រកាសដោយលោក វេង សាខុន រដ្ឋមន្រ្តីក្រសួងកសិកម្មនៅថ្ងៃទី១ធ្នូ។

 

 

អស់រយៈ៥ខែហើយ ដែលមៀនប៉ៃលិន បន្តគ្មានទីផ្សារ និងលក់បានតម្លៃថោក ដោយសារថៃបិទមិនឲ្យនាំចូល ខណៈផ្លែមៀនកម្ពុជា ត្រូវពឹងលើទីផ្សាររបស់ប្រទេសថៃ។ កសិករជាច្រើន បានត្អូញត្អែរពីការខាតបង់របស់ខ្លួន និងស្នើឲ្យក្រសួងកសិកម្ម ពន្លឿនការនាំចេញផ្លែមៀនប៉ៃលិន ទៅកាន់ប្រទេសចិនដោយផ្ទាល់ ដើម្បីធានាឲ្យបាននូវទីផ្សារពិតប្រាកដ។ 

 

កាលពីថ្ងៃទី១២ខែសីហា កសិករនៅខេត្តប៉ៃលិន និងបាត់ដំបង ជាច្រើនរយនាក់ បានប្រមូលផ្ដុំតវ៉ានៅច្រកព្រំដែនដូង ស្ថិតក្នុងស្រុកកំរៀង ខេត្តបាត់ដំបង ដើម្បីទាមទារឲ្យភាគីថៃ ជួយសម្រួលឲ្យពួកគេអាចនាំផ្លែមៀនទៅលក់នៅថៃឡើងវិញ។ 

 

កាលពីថ្ងៃទី១៧សីហា សម្ដេច ហ៊ុន សែន ក៏បានប្រកាសទទួលទិញផ្លែមៀនពីកសិករមួយចំនួន ដើម្បីដោះស្រាយបញ្ហាមៀនកំពុងមានបញ្ហាទីផ្សារ។ ដ្បិតមានការជួយទិញពីនាយករដ្ឋមន្រ្តីមែន ប៉ុន្តែជួយដោះស្រាយបញ្ហាកសិករបានឡើយ។ កសិករ លើកឡើងថា​ ការជួយទិញនេះ នឹងមិនអាចដោះស្រាយបញ្ហាទីផ្សារផ្លែមៀនប៉ៃលិន រយៈពេលវែងបានទេ ប្រសិនបើ រដ្ឋាភិបាលមិនអាចរកទីផ្សារ ដែលមានលំនឹងពិតប្រាកដសម្រាប់ពលរដ្ឋ។ 

 

មកដល់ពេលនេះថៃនៅតែបន្តបិទមិនឲ្យនាំផ្លែមានប៉ៃលិន ទៅកាន់ប្រទេសរបស់ខ្លួន ខណៈលោក វេង សាខុន រដ្ឋមន្រ្តីក្រសួងកសិកម្ម បានលើកឡើងថា ក្រសួង បានដឹងពីបញ្ហាប្រឈមរបស់កសិករ។ ប៉ុន្តែការដោះស្រាយមិនមែនជាការងារងាយស្រួលនោះទេ គឺត្រូវដោះស្រាយជាកញ្ចប់ ដែលមានការជាប់ពាក់ព័ន្ធជាលក្ខណៈអន្តរក្រសួង និងត្រូវពិនិត្យលើតម្លៃដឹកជញ្ជូន និងពេលវេលា ការលាងសម្អាតសមាសភាពចង្រៃ ការវិចខ្ចប់ ការស្តុកត្រជាក់ តម្លៃកុងទ័នឺរជាដើម រួមទាំងសមត្ថភាពវិស័យឯកជន គុណភាពផលិតផល និងលក្ខខណ្ឌតម្រូវទីផ្សារនៅក្រៅប្រទេសផងដែរ។

ទោះជាយ៉ាងនេះ ផ្លែមៀន​ប៉ៃលិន អាចនឹងមានសង្ឃឹមឡើងវិញ គឺបន្ទាប់រដ្ឋាភិបាលចិន សម្រេចសិក្សា និងវិភាគហានិភ័យលើផ្លែមៀន ដើម្បីនាំចេញទៅកាន់ទីផ្សារប្រទេសចិននាពេលរដូវប្រមូលផលលើកក្រោយ៕ 

 

 

ជាង ៣ខែហើយទីផ្សារជូករស់កម្ពុជា នៅតែបន្តធ្លាក់ថ្លៃ ខណៈសមាគមអ្នកចិញ្ចឹមសត្វកម្ពុជា បានអះអាងថា តម្លៃជ្រូករស់នឹងងើបឡើងវិញ នៅពាក់កណ្ដាលខែធ្នូ ឬដើមខែមករា បន្ទាប់ពីរដ្ឋាភិបាលបើកឲ្យដំណើរការប្រទេស។ ស្របពេលនេះ ក្រសួងកសិកម្ម បានបិទការនាំចូលពីប្រទេសជិតខាងទាំងស្រុង ដូច្នេះ ជ្រូករស់អាចនឹងឡើងថ្លៃដល់១១០០០ ទៅ១២០០០រៀលក្នុងមួយគីឡូ។

 

ទីផ្សារជ្រូកបានធ្លាក់ចុះយ៉ាងគំហុក តាំងបុណ្យពិធីបុណ្យភ្ជុំបិណ្ឌមក។ សព្វថ្ងៃ កសិករចិញ្ចឹមជ្រូកក្នុងស្រុករងការខាតបង់យ៉ាងខ្លាំងដោយសារតម្លៃថោក និងគ្មានទីផ្សារ រីឯចំណីឡើងថ្លៃ។ ដូច្នេះ ប្រសិនបើ តម្លៃជ្រូករស់ឡើងមិនដល់១២០០០រៀលនោះទេ កសិករនឹងប្រឈមខាតបង់ទៀត។ លោក ស្រ៊ុន ពៅ ប្រធានសមគមអ្នកចិញ្ចឹមសត្វកម្ពុជា បានប្រាប់សារព័ត៌មានថ្មីៗកាល២៥ពីថ្ងៃទី១៧ ខែវិច្ឆិកា។

 

ទោះជាយ៉ាងណា លោក ស៊្រុន ពៅ អះអាងថា តម្លៃជ្រូករស់នៅកម្ពុជានឹងងើបឡើងវិញ បន្ទាប់ពីរដ្ឋាភិបាលបើកឲ្យរៀបចំពិធីមង្គលការ បុណ្យ និងទេសចរណ៌ទូទាំងប្រទេស ខណៈក្រសួងកសិកម្ម បានបិទការនាំចូទាំងស្រុងពីប្រទេសជិតខាង។

 

លោក ប្រាប់ដូច្នេះថា៖«ខ្ញុំជឿជាក់ថា មិនឲ្យហួស១ខែទៀតទេ ជ្រូករស់នឹងឡើងថ្លៃវិញ។ អ៊ីចឹង! យើងសង្ឃឹមថាវានឹងឡើងថ្លៃ ក្រោមមូលហេតុ យើងបិទមិនឲ្យប្រទេសជិតខាងចូល។ យើងបិទការនាំចូលទាំងស្រុក កាលពីអាទិត្យមុន ហើយខ្ញុំក៏បានចុះល្បាត ដើម្បីយកព័ត៌មានតាមព្រំដែនដែរ ឃើញថាពិតជាមានការបិទ១០០ភាគរយមែន»។ 

 

 

ជិត១ឆ្នាំមកនេះ មានពលរដ្ឋជាច្រើននៅតែត្អូញត្អែពីស្រូវគ្មានទីផ្សារ និងតម្លៃថោក ស្របពេលជី និងថ្នាំកសិកម្ម បន្តឡើងថ្លៃជាបន្តបន្ទាប់ ដែលបានធ្វើឲ្យកសិករមួយចំនួន រងការខាតបង់ប្រាក់ចំណូលកាន់តែខ្លាំង ។ កសិផល គ្មានឈ្មួញទិញ និងលក់បានតម្លៃថោក។ កសិករខ្លះ ចង់បោះបង់មុខរបរធ្វើស្រែចម្ការ ដោយងាកទៅធ្វើការងាររោងចក្រ ឬសំណង់វិញ ប្រសិនបើរដ្ឋមិនជួយដោះស្រាយ។