វេទិកាទេសចរណ៍អាស៊ានលើកទី៤០ ឆ្នាំ២០២២ ដែលកម្ពុជាជាម្ចាស់ផ្ទះនោះ បានចាប់ផ្ដើមហើយ។ វេទិកាអន្តរជាតិនេះ រៀបចំធ្វើឡើងនៅសណ្ឋាគារសុខា និងទីលានតេជោ ក្នុងសង្កាត់លេខ៤ ក្រុងព្រះសីហនុ ខេត្តព្រះសីហនុ ចាប់ពីថ្ងៃទី១៦ ដល់ទី២២ ខែមករា។ 
 

ដើម្បីរក្សាសណ្ដាប់ធ្នាប់ និងបញ្ចៀសការកកស្ទះចរាចរណ៍ លោក គួច ចំរើន អភិបាលខេត្តព្រះសីហនុ បានប្រកាសផ្អាកចរាចរឆ្លងកាត់វិថីតេជោ (ទីលានតេជោ) ចាប់ពីចំណុចត្រីកោណប្រសព្វព្រះស្តន្ទទ្រង់ក្ងោក (ជិតកន្ទុយនាគឆ្នេរសុខា) ដល់ចុងផ្លូវលេខ៥០២ (ផែទូកទេសចរណ៍៥០២) ចាប់ពីម៉ោង៦ព្រឹក រយៈពេល៣ថ្ងៃ ចាប់ពីថ្ងៃទី១៧ ដល់ទី១៩ ខែមករា៕