ជាតិ
ស្ត្រីចំណាស់ម្នាក់យំសោកបោកខ្លួនមុខរោងល្ខោន ព្រោះអាណិតតួស្រីដែលដូចសាច់រឿងពិតខ្លួន
× ជីវិតដូចជាការសម្តែង! អាណិតតួស្រី ខឹងតួប្រុស! នេះជាទស្សនីយភាពក្រៅឆាករបស់ស្ត្រីចំណាស់ម្នាក់ នៅមុខ រោងល្ខោនបាសាក់មួយ នាខេត្តព្រៃវែងកាលពីពេលថ្មីៗកន្លងមកនេះ។ កាយវិការចូលតួ របស់អ្នកគាំទ្រល្ខោន ខ្មែររូបនេះ ត្រូវបង្ហោះ និងចែកចាយពេញបណ្តាញសង្គមហ្វេសប៊ុក។
ឃ្លីបវីដេអូខ្លីប្រមាណ២នាទី បង្ហាញពីស្ត្រីវ័យចំណាស់ម្នាក់យំបោកខ្លួនមុខឆាកល្ខោនបាសាក់ ក្នុងឈុតតួប្រុស កំពុងវាយដំតួស្រី។ មានការចែករំលែកតៗគ្នាក្នុងបណ្ដាញសង្គមហ្វេសប៊ុក ដោយអ្នកខ្លះបញ្ចេញមតិក្នុងន័យកំប្លុកបំប្លែង ខ្លះកោតសរសើរចំពោះការស្មោះស្ម័គ្រចំពោះល្ខោនបាសាក់ ហើយមួយចំនួនក៏ឆ្លៀតរិះគន់ផងដែរ។
មិនត្រឹមតែយំសោកបោកខ្លួន និងអង្រួនឆាកនោះឡើយ Fan ល្ខោនបាសាក់វ័យប្រមាណ៦០ឆ្នាំ រូបនោះ ថែមទាំងទាញខ្សែតី ឃាត់កុំឲ្យតួប្រុសវាយតួស្រីទៀតផង ដោយគាត់ភ្លេចគិតថា វាត្រឹមតែជាការ សម្តែង តាមសាច់រឿងប៉ុណ្ណោះ។ តាមវីដេអូ តួសម្តែងផ្សេងទៀត ក៏ហាក់ដូចជាប្រឹងទប់សំណើចផងដែរ នៅពេលឃើញកាយវិការរបស់អ្នកគាំទ្រ។
សារព័ត៌មានថ្មីៗ បានទាក់ទងទៅក្រុមវង់ល្ខោន សួរនាំពីបញ្ហានេះ។ បើតាម លោក កែវ សុភ័ណ្ឌ ម្ចាស់វង់ល្ខោនបាសាក់ កែវសុភ័ណ្ឌតួព្រះវេសន្តរ ខេត្តកំពង់ចាម និងជាតួឯកប្រុសក្នុងរឿង «ពិនវង្ស» អ្នកតាមដានចូលតួ ដោយសារតែជីវិតគាត់ដូចជាជីវិតតួស្រីនៅក្នុងសាច់រឿង។
ការសម្តែងនៅពេលនោះ គឺស្ថិតនៅក្នុងវត្តថ្នល់ជ័យ ខេត្តព្រៃវែង។ លោក សុភ័ណ្ឌ មិនបានសួរនាំអ្វីច្រើនឡើយ ប៉ុន្តែគាត់បានបញ្ជាក់ថា៖ «គាត់យំបោកខ្លួន ព្រោះធ្លាប់មានប្រវត្តិប្ដីធ្វើបាប។ គេឃាត់យ៉ាងមិច ក៏គាត់នៅតែយំចូលតួតាមសាច់រឿង។ គាត់ភ្លេចថាគេសម្ដែង។ គាត់ថាប្ដីធ្លាប់ធ្វើបាប ប្រើអំពើហិង្សា។ ប្ដីគាត់មានប្រពន្ធពីរ ហើយក្នុងសាច់រឿងប្ដីមានប្រពន្ធពីរដែរ ។ ប្ដីគាត់វាយគាត់ហើមមុខ ហើមមាត់រាល់ថ្ងៃ ទើបគាត់ចូលតួ យកដបទឹកសុទ្ធគប់តួប្រុស »។
បើតាមម្ចាស់វង់ល្ខោនបាសាក់កែវសុភ័ណ្ឌតួព្រះវេសន្តរ ខេត្តកំពង់ចាម បន្ទាប់ពីការសម្ដែងឈុត វាយប្រពន្ធនោះហើយ ក្រុមការងាររបស់លោក បានប្រកាសថានេះគ្រាន់តែការសម្ដែងប៉ុណ្ណោះ ទើបស្ត្រីរូបនោះរំសាយអារម្មណ៍ ឈប់ខឹងសម្បានឹងតួប្រុសទៀត។
លោកបន្តប្រាប់ ThmeyThmey ថា នេះមិនមែនជាលើកទីមួយទេ ដែលអ្នកមើលចូលតួតាមសាច់រឿង ខណៈពេលខ្លះអ្នកមើលខឹងតួសម្ដែងរហូតយករបស់របរទៅគប់តួនៅក្រោយឆាកថែមទៀតផង៕
© រក្សាសិទ្ធិដោយ thmeythmey.com