កីឡាអន្តរជាតិ
អន្តរជាតិ
Ramos ថា នឹងរកគ្រាប់បាល់ច្រើនបន្ថែមទៀត ក្រោយស៊ុតគ្រាប់ដំបូងឱ្យ PSG
× ខ្សែការពារ Sergio Ramos សង្ឃឹមថា នឹងបន្តជួយស្វែងរកគ្រាប់បាល់ឱ្យ Paris Saint Germain បន្ថែមទៀត បន្ទាប់ពីរកបានគ្រាប់លើកដំបូងទល់នឹងក្រុម Reims នៅថ្ងៃទី២៣ ខែមករា។ PSG ឈ្នះដោយលទ្ធផល ៤-០។
ខ្សែការពារវ័យ៣៥ឆ្នាំ ជាអ្នកស៊ុតគ្រាប់ទី២ឱ្យក្រុម PSG នៅនាទី៦២ ខណៈ៣គ្រាប់ផ្សេងទៀតរកបានដោយកីឡាករ Marco Verratti, Danilo Pereira និងការស៊ុតបញ្ចូលទីខ្លួនឯងដោយកីឡាករ Reim Wout Faes។
ជាមួយគ្រាប់ដំបូងព្រមគ្នានឹងការលេង៩០នាទីពេញ Ramos អះអាងថា ពិតជាសប្បាយចិត្តខ្លាំង ហើយនឹងបន្តស្វែងរកគ្រាប់បាល់ឱ្យបានច្រើនបន្ថែមទៀតឱ្យ PSG។
«ខ្ញុំពិតជាសប្បាយចិត្តចំពោះជ័យជម្នះ ក៏ជាគ្រាប់ដំបូងជាមួយក្រុម ហើយខ្ញុំសប្បាយចិត្តដែលលេងបានពេញ៩០នាទី។ វាជាគ្រាប់ដំបូងរបស់ខ្ញុំសម្រាប់ PSG ខ្ញុំសង្ឃឹមថាគ្រាប់បាល់ជាច្រើននឹងបន្តកើតឡើង។» Ramos ប្រាប់ទៅកាន់ Amazon Prime Video បែបនេះក្រោយចប់ការប្រកួត។
នេះជាការបង្ហាញខ្លួនលើកទីពីរសម្រាប់ខ្សែការពារសញ្ជាតិអេស្ប៉ាញក្នុងក្របខណ្ឌ Ligue 1 ឱ្យក្រុម PSG។ កាលពីចាប់ផ្តើមរដូវកាលមក Ramos ខនខានមិនបានជួយក្រុមដោយសារតែមានការរងរបួសបន្ទាប់ពីផ្ទេរមកពីក្លិប Real Madrid៕
Tag:
Sergio Ramos
Paris Saint Germain
© រក្សាសិទ្ធិដោយ thmeythmey.com