កីឡាអន្តរជាតិ
អន្តរជាតិ
Premier League ដកចេញវិធានការមួយចំនួន ក្រោយករណីឆ្លងកូវីដ-១៩ ថយចុះ
× ក្របខណ្ឌបាល់ទាត់កំពូលអង់គ្លេស Premier League បានបញ្ជាក់ពីការសម្រេចចិត្តដកចោលវិធានការការពារកូវីដ-១៩ មួយចំនួនចេញ ដូចជាការពាក់របាំងមុខការពារក្នុងតំបន់ដែលក្លិបនីមួយៗធ្វើការចាប់ពីថ្ងៃទី១១ នេះតទៅ។
ចំពោះការសម្រេចចិត្តដកចេញនូវវិធានការបែបនេះ Premier League បញ្ជាក់ថា ជាសម្រេចចិត្តរួមមួយ ក្នុងកិច្ចប្រជុំជាមួយម្ចាស់ភាគហ៊ុនទាំងអស់នាថ្ងៃទី១០ ខែកុម្ភៈ។
កាលពីខែធ្នូឆ្នាំ២០២១ រហូតដល់ខែមករាឆ្នាំ ២០២២ ការប្រកួតលីគកំពូលអង់គ្លេសជាង ២០ បានផ្អាកដោយសារតែករណីឆ្លងកូវីដ-១៩ លើបុគ្គលិកនិងកីឡាកររបស់ក្លិបទាំងអស់។ តាមកំណត់ត្រាករណីឆ្លងលើកីឡាករមានរហូតដល់ ១០៣ករណីអំឡុងពេលសម្រាក់ Christmas ធ្វើឱ្យក្រុមនីមួយៗគ្មានកីឡាករគ្រប់គ្រាន់សម្រាប់ប្រកួត។
អំឡុងពេលមានករណីឆ្លងខ្លាំង Premier League បានបង្កើនវិធានការសង្រ្គោះបន្ទាន់ដោយបង្កើនការធ្វើ PCR តេស្តជារឿយៗលើកីឡាករនិងបុគ្គលិកក្លិបទាំងអស់។ ទោះជាយ៉ាងនេះក្តីក្រោយតួរលេខឆ្លងថយចុះ Premier League បានអះអាង ការធ្វើតេស្តនឹងធ្វើ២ដងក្នុងមួយសប្តាហ៍ ហើយវិធានការមួយចំនួនត្រូវដកចេញ។
«ខណៈពេលការការពារកូវីដ-១៩ ពីសាធារណៈខាងក្រៅធ្វើបានយ៉ាងល្អ ការរឹតបន្តឹងមួយចំនួនដូចជាការពាក់ម៉ាស់ និងរបាំងមុខការពារក្នុងតំបន់ដែលក្លិបនីមួយៗធ្វើការត្រូវដកចេញ»។ ក្របខណ្ឌ Premier League លើកឡើងបែបនេះ។
មិនត្រឹមតែប៉ុណ្ណោះ Premier League ក៏បានអះអាង វិធានការសង្រ្គោះបន្ទាន់ផ្សេងទៀតនៅតែស្ថិតក្រោយការត្រួតពិនិត្យជាប្រចាំ ប៉ុន្តែអាចនឹងបិទបញ្ចប់ត្រឹមចុងខែកុម្ភៈនេះ៕
Tag:
Premier League
Covid-19
© រក្សាសិទ្ធិដោយ thmeythmey.com