នាយឧត្តមសេនីយ៍ អគ្គនាយកមជ្ឈមណ្ឌលជាតិគ្រប់គ្រង កងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម ថ្លែងក្នុងពិធីជូនដំណើរទ័ពមួកខៀវទាំង២១៩នាក់ ថា បេសកកម្មនៅអាហ្វ្រិកកណ្តាលនេះ គឺជាបេសកកម្មលើកទី៨ ឬឆ្នាំទី៨ហើយ ដោយទទួលបានទំនុកចិត្តពីអង្គការសហប្រជាជាតិ ក្នុងការចូលរួមចំណែកស្វែងរកសុខសន្តិភាព ជូនប្រទេសដែលរងដោយជម្លោះ។ 

 

ទំព័រហ្វេសប៊ុក មជ្ឈមណ្ឌលជាតិរក្សាសន្តិភាព បានបង្ហោះប្រសាសន៍របស់លោកយ៉ាងដូច្នេះថា៖«នៅថ្ងៃនេះ គឺជាមោទនភាពថ្មីមួយទៀត សម្រាប់ជាតិមាតុភូមិយើង ដែលវីរយុទ្ធជន យុទ្ធនារីយើង បានខិតខំហ្វឹកហាត់អស់រយៈពេលជាយូរទទួលបាននូវក្តីសង្ឃឹម និងទំនុកចិត្តយ៉ាងពិតប្រាកដពីអង្គការសហប្រជាជាតិ និងប្រមុខរាជរដ្ឋាភិបាល ដើម្បីយកចំណេះ ជំនាញទាំងនេះ ទៅអនុវត្តផ្ទាល់នៅលើសមរភូមិ»។

 

គិតចាប់តាំងពីឆ្នាំ២០០៦មក កម្ពុជាបានបញ្ជូនកងកម្លាំងរក្សាសន្តិភាព ឬកងទ័ពមួកខៀវជាង៧ពាន់នាក់ ទៅបំពេញបេសកកម្មមនុស្សធម៌ក្រោមឆត្រអង្គការសហប្រជាជាតិ នៅក្នុងប្រទេសចំនួន៩ រួមមាន ស៊ូដង់ ស៊ូដង់ខាងត្បូង ឆាដ លីបង់ ស៊ីរី ម៉ាលី អាហ្វ្រិកកណ្តាល ស៊ីប និងយេម៉ែន។ បច្ចុប្បន្ន កម្ពុជា មានកម្លាំងកងទ័ពមួកខៀវប្រមាណ៨០០នាក់ (នារីជិត៨០នាក់) កំពុងបំពេញបេសកកម្មរក្សាសន្តិភាពក្រោមឆត្រអង្គការសហប្រជាជាតិ នៅប្រទេសលីបង់ ស៊ូដង់ ស៊ូដង់ខាងត្បូង ម៉ាលី និងអាហ្វ្រិកកណ្តាល៕