រដ្ឋាភិបាលជប៉ុន នៅថ្ងៃទី២៣ ខែកុម្ភៈ បានសម្រេចផ្ដល់ជំនួយហិរញ្ញប្បទានឥតសំណងចំនួន ១ ៧៩៩ ១៦៦ ដុល្លារអាមេរិក សម្រាប់អង្គការក្រៅរដ្ឋាភិបាលជប៉ុន ក្នុងប្រទេសកម្ពុជា។ បើតាមស្ថានទូតជប៉ុននៅកម្ពុជា ជំនួយហិរញ្ញវត្ថុខាងលើនេះ សម្រាប់លើកកម្ពស់ការអភិវឌ្ឍសហគមន៍ តាមរយៈការបោសសម្អាតគ្រាប់បែកចង្កោម គ្រាប់មីន និងយុទ្ធភណ្ឌមិនទាន់ផ្ទុះ ក្នុងខេត្តស្ទឹងត្រែង និងខេត្តបន្ទាយមានជ័យ។ 
 

តាមការចេញផ្សាយរបស់ស្ថានទូតជប៉ុននៅកម្ពុជា ជំនួយខាងលើនេះ ផ្ដល់ទៅអង្គការសកម្មភាពកំចាត់មីនជប៉ុន JMAS សម្រាប់អនុវត្តគម្រោងគាំទ្រការស្ថាបនាហេដ្ឋារចនាសម្ព័ន្ធឡើងវិញ និងការបោសសំអាតគ្រាប់បែកចង្កោម ក្នុងខេត្តស្ទឹងត្រែង (RSCS)ឆ្នាំទី២ ក្នុងទំហំទឹកប្រាក់ ៩០០ ៧៨៧ដុល្លារ។ ចំណែកគម្រោងទី២ ក្នុងទំហំទឹកប្រាក់ចំនួន ៨៩៨ ៣៧៩ដុល្លារ សម្រាប់អនុវត្តគម្រោង គាំទ្រការស្ថាបនាហេដ្ឋារចនាសម្ព័ន្ធឡើងវិញ នឹងការបោសសំអាតមីន នៅខេត្តបន្ទាយមានជ័យ (RSDB)ឆ្នាំទី២។ 
 

នាឱកាសចុះហត្ថលេខាលើកិច្ចសន្យាផ្ដល់ជំនួយឥតសំណងនេះ លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុន និងអ្នកតំណាងមកពីអង្គការ JMAS លើកឡើងថា រដ្ឋាពិបាលជប៉ុន ចាត់ទុកការធ្វើការជាមួយអង្កការក្រៅរដ្ឋាភិបាលជប៉ុន និងអាជ្ញាធរមូលដ្ឋានកម្ពុជា គឺមានសារៈសំខាន់ដូចគ្នា ក្នុងការចូលរួមចំណែកកែលម្អគុណភាពជីវិត របស់ប្រជាជនដែលរស់នៅក្នុងទីតាំងគម្រោងនីមួយៗ៕