ក្រៅពីមិនឲ្យទៅបម្រើការងារឲ្យគណបក្សនយោបាយនៅក្នុងម៉ោងធ្វើការងាររដ្ឋ សម្តេច ស ខេង ថែមទាំងណែនាំមន្រ្តីរាជការស៊ីវិល មិនឲ្យប្រើប្រាស់ថវិកា សម្ភារៈ ទីកន្លែង និង មធ្យោយដឹកជញ្ជូនរបស់រដ្ឋ ដើម្បីធ្វើសកម្មភាពឃោសនាបោះឆ្នោតឲ្យគណបក្សនយោបាយណាមួយផងដែរ។ ជាមួយគ្នានេះ សម្តេច បានដាស់តឿនមន្រ្តីរាជការស៊ីវិលទាំងអស់ ឲ្យមានអព្យាក្រឹតក្នុងសកម្មភាពការងារ ស្របតាមច្បាប់ស្តីពីការលក្ខន្តិកៈមន្រ្តីរាជការស៊ីវិល។ 
 

ជាងនេះទៅទៀត សម្តេចរដ្ឋមន្រ្តី ដាក់បញ្ជាថា ក្នុងរយៈពេលឃោសនាបោះឆ្នោត មន្រ្តីរាជការស៊ីវិល និងអាជ្ញាធរដែនដីគ្រប់លំដាប់ថ្នាក់ ត្រូវអនុវត្តឲ្យបានម៉ឺងម៉ាត់តាមច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ បទបញ្ជា និង នីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់។ ចំពោះមន្រ្តីរាជការ ដែលមានបំណងឈរឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់ មន្រ្តីរាជការនោះ ត្រូវដាក់ពាក្យសុំឈប់ពិសេស ឲ្យបានយ៉ាងតិចមុន៧ថ្ងៃ នៃការមកដល់ថ្ងៃបើកយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់។ 
 

ការបើកយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ មានរយៈពេល១៤ថ្ងៃ ចាប់ពីថ្ងៃទី២១ ខែឧសភា ដល់ថ្ងៃទី៣ ខែមិថុនា ឆ្នាំ២០២២។ រំលង១ថ្ងៃ គឺនៅថ្ងៃទី៥ ខែមិថុនា ឆ្នាំ២០២២ ជាថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ដែលជាអាណត្តិថ្មី៕