ជាតិ
អាម៉េរិកផ្ដល់ជំនួយ៦,៣លានដុល្លារ គាំទ្រអង្គភាពស៊ីម៉ាក់បោសសម្អាតមីននៅខេត្តចំនួន៧ រូបភាពពីហ្វេសប៊ុកលោក ហេង រតនា
× ភ្នំពេញ៖ រដ្ឋាភិបាលអាម៉េរិក ផ្ដល់ជំនួយថវិកាជាង៦,៣លានដុល្លារដល់កម្ពុជា ដើម្បីគាំទ្រមជ្ឈមណ្ឌលកំចាត់មីនកម្ពុជា CMAC ក្នុងការបោសសម្អាតមីន និងគ្រាប់បែកចង្កោម នៅតំបន់រងផលប៉ះពាល់ ក្នុងខេត្តចំនួន៧។
បើតាមលោក ហេង រតនា អគ្គនាយកស៊ីម៉ាក់ ជំនួយថវិកានេះ រដ្ឋាភិបាលអាម៉េរិក តាមរយអង្គការ NPA ប្រចាំកម្ពុជា សរុបចំនួន៦,៣៥៥,៧២០ដុល្លារ។ ថវិកានេះ គឺគាំទ្រអង្គភាពស៊ីម៉ាក់ លើការបោសសម្អាតមីន និងគ្រាប់បែកចង្កោម នៅតំបន់រងផលប៉ះពាល់ ក្នុងខេត្តខេត្តស្វាយរៀង ព្រៃវែង កំពង់ចាម ត្បូងឃ្មុំ ក្រចេះ រតន:គិរី និងខេត្តមណ្ឌលគិរី។
ជំនួយហិរញ្ញប្បទានឥតសំណងជាង៦លានដុល្លារនេះ ប្រើប្រាស់សម្រាប់បោសសម្អាតគ្រាប់បែកចង្កោម រយៈពេល៤៥ខែ ចាប់ពីខែមីនា ឆ្នាំ២០២២ ដល់ខែវិច្ឆិកា ឆ្នាំ២០២៥។ នេះបើតាមលោក ហេង រតនា ដែលបញ្ជាក់ថា ជំនួយនេះ មានរយៈពេលយូរជាងរាល់ឆ្នាំ ប៉ុន្តែបរិមាណថវិកា គឺដូចឆ្នាំមុនៗដែរ។ ជំនួយនេះ ក៏បានផ្តល់លទ្ធភាពឱ្យអង្គភាពស៊ីម៉ាក់ អាចពង្រាយកម្លាំងប្រតិបត្តិការជាង២០០នាក់ និងអាចរំដោះផ្ទៃដីតំបន់គ្រាប់បែកចង្កោមជាង១៣,២០០ហិកតាផងដែរ។
រូបភាពពីហ្វេសលោក ហេង រតនា
ទន្ទឹមនឹងនេះ ក្រសួងការបរទេសNorway ក៏បានសម្រេចផ្តល់ថវិកាខ្នាតតូចចំនួន៨៩,០៧៧ដុល្លារ លើគម្រោងចំនួន២ គឺគម្រោងរំដោះខេត្តគ្មានគ្រាប់មីនដែលកំពុងប្រតិបត្តិការ និងគម្រោងបោសសំអាតមីនតំបន់ព្រំដែនកម្ពុជា-ថៃ ក្នុងរយៈពេល ៣ខែ។
កន្លងមក អាម៉េរិក ចិន ជប៉ុន ប៉ែលហ្សិក នូវ៉េស និងអង្គការមួយចំនួនទៀត ក៏បានផ្ដល់ជំនួយហិរញ្ញប្បទានឥតសំណងដល់កម្ពុជា លើការងារបោសសម្អាតមីនគ្រាប់ប្រភេទ នៅតំបន់ដែលរងផលប៉ះពាល់នានាផងដែរ។ ហើយកាលពីឆ្នាំ២០២០កន្លងទៅ ស៊ីម៉ាក់បានរកឃើញ និងបំផ្លាញចោលមីនជាង៩ម៉ឺនគ្រាប់ នៅលើដីចម្ការរបស់ពលរដ្ឋប្រមាណ៩១លានម៉ែត្រក្រឡា ដែលស្នើនឹង៩១ភាគរយនៃផែនការ។ ចំណែកឯ ឆ្នាំ២០២២នេះ ស៊ីម៉ាកបានកំណត់ផែនការសម្អាតមីន លើផ្ទៃដី១២៤គីឡូម៉ែត្រក្រឡា តាមរយៈគម្រោងរបស់រដ្ឋាភិបាល និងជំនួយផ្សេងៗមួយចំនួនទៀតផង៕
© រក្សាសិទ្ធិដោយ thmeythmey.com