លោក Tymoshchuk ជាអតីតកីឡាករក្រុមជម្រើសជាតិអ៊ុយក្រែនដែលធ្លាប់បានបង្ហាញខ្លួនចំនួន ១៤៤លើក និងធ្លាប់ជាប្រធានក្រុមអស់រយៈពេល៤ឆ្នាំមុនពេលចូលនិវត្តន៍ពីក្រុមជម្រើសជាតិក្នុងឆ្នាំ២០១៦។ កីឡាករវ័យ៤២ឆ្នាំក៏បានសម្រេចចិត្តបន្តធ្វើការងារឱ្យក្រុម Zenit St Petersburg បើទោះបីជារុស្ស៊ីជាកំពុងបន្តវាយប្រហារប្រទេសកំណើតក៏ដោយ។
 

Tymoshchuk បានរងនូវការរិះគន់យ៉ាងខ្លាំងពីសំណាក់ប្រជាជនអ៊ុយក្រែនចំពោះការសម្រេចចិត្តមិននិយាយស្តីអ្វីដែលពាក់ព័ន្ធទៅនឹងប្រទេសកំណើតដែលត្រូវរងការវាយប្រហារជាបន្តបន្ទាប់ពីរុស្ស៊ី។ កីឡាកររូបនេះ ក៏នៅតែបន្តបង្ហោះរូបភាពដែលកំពុងធ្វើការជាមួយក្លិប Zenit St Petersburg ជាប្រចាំ។
 

កាលពីសប្តាហ៍មុន ខ្សែបម្រើរបស់ក្លិប Atalanta កីឡាករ Ruslan Malinovskyi បានបង្ហាញប្រត្តិកម្មចំពោះ Tymoshchuk ហើយបាននិយាយរិះគន់ថា កេរិ៍្តឈ្មោះរបស់កីឡាករវ័យ៤២ឆ្នាំគឺកំពុងតែរសាត់ឆ្ងាយហើយ។
 

«ខ្ញុំពិតជាមិនដឹងថាត្រូវបកស្រាយយ៉ាងមិចឡើយចំពោះ Tymoshchuk អ្នកគួរតែសួរទៅកាត់ ព្រោះខ្ញុំពិបាកនឹងនិយាយខ្លាំងណាស់ វាពិតជារឿងដ៏ចម្លែកពេក។ ខ្ញុំគិតថាគាត់ធ្វើនេះពិតជាមិនត្រឹមត្រូវ ហើយពេលនេះសឹងតែ១០០ភាគរយគាត់លែងក្លាយជាវិរៈបុរសបាល់ទាត់របស់អ៊ុយក្រែនទៀតហើយ។»កីឡាករ Malinovskyi បានសរសេរបង្ហោះលើ Twitter បែបនេះ។
 

រដ្ឋាភិបាលអ៊ុយក្រែនបានស្នើសុំឱ្យដកហូតរាល់សមិទ្ធផល មេដាយ និងពានរង្វាន់កត្តិយសដែលលោក Tymoshchuk ឈ្នះទាំងអស់សម្រាប់ប្រទេសអ៊ុយក្រែន ក្នុងនោះក៏មានដូចជាពានរង្វាន់លីគឱ្យក្លិប Shaktar Donetsk ១ Ukrainian Cups ៣ និង Super Cup ១ ផងដែរ។
 

មិនត្រឹមតែប៉ុណ្ណោះសហព័ន្ធបាល់ទាត់អ៊ុយក្រែនក៏ចង់ដកហូតឈ្មោះដែល Tymoshchuk លេង១៤៤ប្រកួតឱ្យអ៊ុយក្រែនចេញ ហើយសហព័ន្ធកំពុងតែស្នើសុំដកហូតរឿងទាំងនេះពីរដ្ឋាភិបាល៕