ជាតិ
រដ្ឋមន្ត្រីកសិកម្មចែកអង្ករជំនួយសង្គ្រោះបន្ទាន់ដល់ពលរដ្ឋ៧ខេត្ត ដែលរងផលប៉ះពាល់ដោយសារកូវីដ
× ពលរដ្ឋជាង២០០០គ្រួសារ តំណាងឲ្យ៧៥០០គ្រួសារក្នុងខេត្តចំនួន៧ បានទទួលអង្ករ ៤០គីឡូក្រាមក្នុងមួយគ្រួសារ ពីលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។ អង្ករនេះ ជាជំនួយរបស់រដ្ឋាភិបាលសាធារណរដ្ឋកូរ៉េ ដែលផ្ដល់ឱ្យក្រសួងកសិកម្ម សម្រាប់ចែកជូនពលរដ្ឋមានជីវភាពខ្វះខាត ដោយសាររងផលប៉ះពាល់ពីជំងឺកូវីដ-១៩។
កន្លងមក រដ្ឋាភិបាលសាធារណៈរដ្ឋកូរ៉េ បានផ្ដល់ជំនួយអង្ករចំនួន៣០០តោន ដល់ក្រសួងកសិកម្ម សម្រាប់ចែកជូនដល់ពលរដ្ឋ ដែលមានជីវភាពខ្វះខាតចំនួន៧៥០០គ្រួសារ នៅខេត្តចំនួន៧ ដូចជា ខេត្តកំពង់ចាម,ឧត្តរមានជ័យ,សៀមរាប,បាត់ដំបង,បន្ទាយមានជ័យ,ត្បូងឃ្មុំ និងស្វាយរៀង។ នេះបើតាមហ្វេសប៊ុក លោក វេង សាខុន រដ្ឋមន្រ្តីក្រសួងកសិកម្ម ដោយអះអាងថា ពលរដ្ឋទាំងនោះ ជាអ្នករងផលប៉ះពាល់ដោយសារកូវីដ-១៩។
រូបភាពពីហ្វេសប៊ុក លោក វេង សាខុន
គិតត្រឹមថ្ងៃទី១៣ ខែមីនា ឆ្នាំ២០២២ ក្រសួងកសិកម្ម បានចែកជំនួយអង្ករនេះដល់ពលរដ្ឋចំនួន២ ០៦៥គ្រួសារ ក្នុងចំណោមពលរដ្ឋសរុប៧៥០០គ្រួសារ និងអង្ករ៤២,៦០តោន ក្នុងចំណោមអង្ករសរុបចំនួន៣០០តោន។
លោក បញ្ជាក់ថា មន្ទីរកសិកម្ម និងអាជ្ញាធរស្រុក នឹងបន្តចែកជូនដល់ពលរដ្ឋដែលមានជីវភាពខ្វះខាតបន្ថែមទៀត។ជំនួយនេះ នឹងផ្ដល់ជូនពលរដ្ឋខេត្តបន្ទាយមានជ័យ ច្រើនជាងគេ ចំនួន១៥០០គ្រួសារ និងពលរដ្ឋនៅខេត្តចំនួន៦ទៀត នឹងផ្ដល់ឱ្យ១០០០គ្រួសារ ក្នុងមួយខេត្ត។
រូបភាពពីហ្វេសប៊ុក លោក វេង សាខុន
«ចំពោះពលរដ្ឋដែលមិនទាន់ទទួលអង្ករ អាជ្ញាធរខេត្ត ស្រុក សហការជាមួយមន្ទីរកសិកម្មខេត្តគោលដៅ នឹងនាំយកទៅចែកជូនជាបន្តបន្ទាប់»។ នេះជាការអះអាងរបស់លោក វេង សាខុន៕
© រក្សាសិទ្ធិដោយ thmeythmey.com