ក្រោយសាងសងរួចជាស្ថាពរបានជាង២ឆ្នាំ ផ្លូវជាតិលេខ២១ ក្រាលបេតុងផ្លូវកៅស៊ូប្រភេទAC ដែលមានប្រវែងប្រមាណ៦៣គីឡូម៉ែត្រ ត្រូវបានប្រកាសដាក់ឱ្យប្រើប្រាស់ជាផ្លូវការ នាថ្ងៃទី២៣មីនា ឆ្នាំ២០២២។ បើតាមលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ផ្លូវនេះសាងសង់ដោយក្រុមហ៊ុន ហានស្សីន វិស្វកម្ម និងសំណង់ (HANSHIN Engineering & Construction Co., Ltd) និងត្រួតពិនិត្យលក្ខណៈបច្ចេកទេស ដោយក្រុមហ៊ុនទីប្រឹក្សាបច្ចេកទេសដាសាន់ (DASAN Consultants Co., Ltd) ក្រោមទំហំថវិកាជិត៦១លានដុល្លារ។ លើសពីនេះ រដ្ឋាភិបាល ក៏ ចំណាយថវិកាបដិភាគប្រមាណ១០លានដុល្លារទៀត ក្នុងការដោះស្រាយផលប៉ះពាល់ ការបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ និងពន្ធអាករផ្សេងៗ។

 

ផ្លូវជាតិលេខ២១ គឺជាខ្សែផ្លូវយុទ្ធសាស្រ្តតភ្ជាប់រាជធានីភ្នំពេញ ជាមួយបណ្តាញផ្លូវគមនាគមន៍មួយចំនួនដូចជា ផ្លូវជាតិលេខ២ (ត្រង់រង្វង់មូលក្រុងតាខ្មៅ) ផ្លូវក្រវាត់ក្រុងទី២ ផ្លូវក្រវាត់ក្រុងទី៣ ផ្លូវជាតិលេខ២១A និងផ្លូវជាតិលេខ២១B ដោយឆ្លងកាត់ក្រុងតាខ្មៅ ស្រុកស្អាង និងស្រុកកោះធំ ឆ្ពោះទៅច្រកព្រំដែនកម្ពុជា-វៀតណាម (ជ្រៃធំ-ឡុងប៊ិញ)។ 

 

លោក Park Heung-kyeong អគ្គរដ្ឋទូតកូរ៉េខាងត្បូងប្រចាំនៅកម្ពុជា បានលើកឡើងថា សមិទ្ធផលផ្លូវជាតិលេខ២១នាពេលនេះ គឺកើតចេញពីចំណងមិត្តភាព កម្ពុជា-កូរ៉េ។ លោក បានបញ្ជាក់ក្នុងពិធីសម្ពោធដាក់ប្រើប្រាស់ផ្លូវជាតិលេខ២១ ថា    ផ្លូវនេះកំពុងដើរតួនាទីយ៉ាងសំខាន់ ក្នុងការជួយសម្រួលការដឹកជញ្ជូនគ្រប់ប្រភេទ។ ជាពិសេសការដឹកទំនិញ និងកសិផលសម្រាប់ការដោះដូរពាណិជ្ជកម្មរ ព្រមទាំងបានជំរុញ និងប្រែក្លាយតំបន់នៅតាមព្រំដែន ឱ្យក្លាយជាតំបន់អភិវឌ្ឍថែមទៀត។

 

បើតាមលោក Park Heung-kyeong តាមរយៈការកសាងមិត្តភាពកម្ពុជា-កូរ៉េ ជាង២០ឆ្នាំមកនេះ ប្រទេសកូរ៉េខាងត្បូងបានអនុវត្តគម្រោងសហប្រតិបត្តិការក្នុងការផ្តល់ជំនួយឥតសំណង និងកម្ចីសម្បទាន ជាង៩០០លានដុល្លារលើវិស័យផ្សេងៗ។ ក្នុងនោះមាន វិស័យហេដ្ឋារចនាសម្ព័ន្ធ  សុខាភិបាល និងការអប់រំ ជាដើម។ សម្រាប់ឆ្នាំ២០២២ កូរ៉េគ្រោងអនុម័តលើកញ្ចប់ថវិកាប្រមាណ១៥០លានដុល្លារ និង គ្រោងអនុម័តលើគម្រោងសាងសង់ស្ពានចំណងមិត្តភាពកម្ពុជា-កូរ៉េ នៅរាជធានីភ្នំពេញ ផងដែរ៕