ដោយ៖ ញឹក សំអូន

 

 

លោក ស៊ុន ចាន់ថុល បានអំពាវនាវឱ្យម្ចាស់រថយន្តទាំងនោះ ប្រញាប់យកយានយន្តទៅត្រួតពិនិត្យឱ្យបានទៀងទាត់ និងទាន់ពេលវេលា ដើម្បីសុវត្ថិភាពខ្លួនឯង និងអ្នករួមដំណើរតាមដងផ្លូវ។ រដ្ឋមន្រ្តីក្រសួងសាធារណការ និងដឹកជញ្ជូន ថ្លែងក្នុងពិធីសម្ពោធបើកឱ្យប្រើប្រាស់ជាផ្លូវការមណ្ឌលត្រួតពិនិត្យលក្ខណៈបច្ចេកទេសយានយន្ត(ឆៀក) សាខាពោធិ៍សែនជ័យ-អូរដឹម នាព្រឹកថ្ងៃទី២៨ មីនា ថា ៖« យានជំនិះចំនួន ៤៩០ពាន់គ្រឿងនៅទូទាំងប្រទេស មិនទាន់បានយកទៅត្រួតពិនិត្យលក្ខណៈបច្ចេកទេស។ ការឆៀករថយន្តមិនមែនយើងយកមកចូលហោប៉ាវកន្លែងឆៀកទេ គឺចូលថវិកាជាតិ ហើយសព្វថ្ងៃយើងយកឡានផាកពិន័យ ឡានឆៀកផុតសុពលភាព ១៧ម៉ឺនគ្រឿង ដែលថវិកាចូលជាតិជាង ៥លានដុល្លារ។ កុំចេះតែបន្ទោសរដ្ឋាភិបាលយកលុយផាកពិន័យ បើយើងមិនខុស គេមិនផាកទេ»។ 

 

រដ្ឋមន្រ្តីក្រសួងសាធារណការ និងដឹកជញ្ជូនរូបនេះ បានលើកឡើងថា គ្រោះថ្នាក់ចរាចរណ៍សព្វថ្ងៃកើតឡើងចេញពីកត្តាយានជំនិះ ដែលមិនបានយកទៅត្រួតពិនិត្យលក្ខណៈបច្ចេក​ទេសឱ្យបានត្រឹមត្រូវ និង​ទៀងទាត់ មានប្រមាណ ៣,៥ភាគរយ , កត្តាមនុស្ស ៩៦ភាគរយ, កត្តាផ្លូវថ្នល់ និងអាកាសធាតុ ០,៥ភាគរយ។

 

បច្ចុប្បន្នកន្លែងឆៀករថយន្តនៅភ្នំពេញមានចំនួន ៧កន្លែង, នៅតាមបណ្ដាទីរួមខេត្តមាន ១២កន្លែង និងកំពុងសាងសង់ផ្សេងៗទៀត។ ចំពោះខេត្តដែលមិនទាន់មានមណ្ឌលឆៀក ក្រសួងសាធារណការ និងដឹកជញ្ជូន បានអនុញ្ញាតឱ្យក្រុមហ៊ុន សៀងវិច និងក្រុមហ៊ុន អេចខេ យករថយន្តឆៀកចល័តទៅដល់ទីតាំងគោលដៅតែម្ដង។ នេះបើតាមលោក ស៊ុន ចាន់ថុល៕