កម្ចី ១,២ពាន់លានដុល្លារ ដែលរដ្ឋាភិបាលនៃសាធារណរដ្ឋកូរ៉េសន្យាផ្តល់ឱ្យកម្ពុជា ត្រូវបានលើកឡើងដោយ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងកិច្ចពិភាក្សាជាមួយលោក KOO Yun Cheol រដ្ឋមន្ត្រីទទួលបន្ទុកសម្រួបសម្រួលគោលនយោបាយរដ្ឋាភិបាលប្រទេសកូរ៉េខាងត្បូង។

 

បើតាមលោក អូន ព័ន្ធមុនីរ័ត្ន ភាគីប្រទេសទាំងពីរនឹងពិភាក្សាសម្រេចយកកញ្ចប់ថវិកាទាំងនេះ​  ទៅលើវិស័យនិងគម្រោងអាទិភាព ក្នុងការប្រើប្រាស់គម្រោងFramework Arrangement តាមរយៈកិច្ចពិគ្រោះយោបល់កម្រិតគោលនយោបាយលើកទី៤(4th Korea-Cambodia Integrated ODA Policy Dialogue) ដែលគ្រោងធ្វើឡើងនាពេលខាងមុខឆាប់ៗ។  នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២៩មីនា ឆ្នាំ២០២២។ 

ក្រៅពីឥណទានសម្បទានដែលទទួលបានពីសាធារដ្ឋកូរ៉េ សម្រាប់អភិវឌ្ឍលើហេដ្ឋារចនាសម្ព័ន្ធចាំបាច់នានា លោក អូន ព័ន្ធមុនីរ័ត្ន ក៏លើកពីតម្រូវការវិនិយោគបន្ថែមរបស់កម្ពុជាលើវិស័យសំខាន់ៗ ដូចជា៖ ហេដ្ឋារចនាសម្ព័ន្ធបៃតង, កសិកម្ម និងឧស្សាហកម្ម​ទេសចរណ៍ ដែលជាវិស័យដ៏មានសក្កានុពល ក្នុងការជំរុញកំណើនសេដ្ឋកិច្ចកម្ពុជា។ ជាងនេះទៀត ការអភិវឌ្ឍវិស័យភស្តុភារកម្ម (Logistics) និងឌីជីថល  ក៏ជាវិស័យអាទិភាពមួយ ដែលកម្ពុជាកំពុងយកចិត្តទុកដាក់ផងដែរ។ 

 

រដ្ឋមន្ត្រីសេដ្ឋកិច្ចរូបនេះ មានប្រសាសន៍ដូច្នេះ៖ «ការកៀរគរទុនវននិយោគពីវិស័យឯកជន ទាំងក្នុងនិងក្រៅប្រទេស ជាកត្តាចាំបាច់មិនអាចខ្វះបាន សម្រាប់ការចូលរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា ផងដែរ»។ ភាគីប្រទេសទាំងពីរ បានពិភាក្សានិងប្តេជ្ញាជំរុញសកម្មភាពពាណិជ្ជកម្ម និងការលើកកម្ពស់វិនិយោគលើវិស័យឯកជន ដើម្បីទាក់ទាញវិនិយោគិនកូរ៉េឱ្យបណ្តាក់ទុនច្រើនបន្ថែមទៀត។ 

 

បច្ចុប្បន្ន កូរ៉េខាងត្បូង ជាដៃគូអភិវឌ្ឍន៍ទ្វេភាគីដ៏សំខាន់លំដាប់ទី៣ ក្នុងការចូលរួមចំណែកគាំទ្រដល់កម្ពុជា បន្ទាប់ប្រទេសចិន និងជប៉ុន។ ចាប់ពីឆ្នាំ១៩៩៦មក កូរ៉េខាងត្បូង​ បានផ្តល់ជំនួយឥតសំណងដល់កម្ពុជា ប្រមាណជា ៤៣១លានដុល្លារ ។ ចាប់ពីឆ្នាំ២០០០មកទល់បច្ចុប្បន្ន ប្រទេសមួយនេះ បានផ្តល់កម្ចីសម្បទានដល់កម្ពុជា ក្នុងទំហំទឹកប្រាក់សរុប ១ ២១១លានដុល្លារ។ នេះបើសេចក្តីប្រកាសព័ត៌មានក្រសួងសេដ្ឋកិច្ចដដែល៕