អ្នកនាំពាក្យរដ្ឋាភិបាល តបថា អ្វី ដែលអ្នករាយការណ៍ពិសេសរបស់អង្គការសហប្រជាជាតិ និយាយពីកម្ពុជា ប្រៀបដូចជាគាត់ និយាយតាមតែមេរៀនក្នុងសៀវភៅប៉ុណ្ណោះ។
លោក វិទិត ម៉ុនតាបន (Vitit Muntarbhorn) អ្នករាយការណ៍ពិសេសរបស់អង្គការសហប្រជាជាតិ (UN) ទទួលបន្ទុកឃ្លាំមើលសិទ្ធិមនុស្សនៅកម្ពុជា បានថ្លែងទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិ នៅថ្ងៃទី២៩ ខែមីនា ឆ្នាំ២០២២ ថា លម្ហពលរដ្ឋ និងលម្ហនយោបាយនៅកម្ពុជា កាន់តែរួមតូចទៅៗ និងដើរថយក្រោយ។ អ្វីដែលលោក ថ្លែងទៅកាន់កិច្ចប្រជុំនៃក្រុមប្រឹក្សាសិទ្ធិមនុស្សអង្គការសហប្រជាជាតិ ត្រូវបានលោក ស្រង់យកទៅសរសេរសង្ខេបលើទំព័រហ្វេសប៊ុក Special Rapporteur Cambodia។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា ឆ្លើយតបថា កម្ពុជា បានកសាងលម្ហនយោបាយ ចាប់តាំងពីក្រោយប្រទេសជាតិជួបការបែកបាក់មក។ ការរៀបចំឲ្យមានការបោះឆ្នោតទាំងថ្នាក់ក្រោមជាតិទាំងថ្នាក់ជាតិ ទៅតាមពេលវេលាត្រឹមត្រូវ និងការរក្សាសន្តិសុខ ស្ថិរភាពនយោបាយជូនប្រជាពលរដ្ឋ ត្រូវលោក ចាត់ទុកជាផ្នែកមួយនៃលម្ហនយោបាយនៅកម្ពុជា។
អ្នកនាំពាក្យរដ្ឋាភិបាលកម្ពុជា មានប្រសាសន៍ជាមួយសារព័ត៌មានថ្មីៗ តាមទូរស័ព្ទនៅព្រឹកថ្ងៃទី៣១ ខែមីនា ឆ្នាំ២០២២ ថា៖«អ្នកដែលចេញមកពីក្រៅ ជាជនបរទេស ដែលចេញពីសាលារៀន មិនដែលមានពិសោធន៍ក្នុងការកសាងសង្គមជាតិមួយចេញពីបរិបទសង្គ្រាមស៊ីវិល លោក និយាយតាមសៀវភៅទេ»។
អ្នករាយការណ៍ពិសេសរបស់អង្គការសហប្រជាតិ លើកឡើងទៀតថា លោក នៅតែមានក្តីបារម្ភចំពោះបញ្ហាសិទ្ធិមនុស្ស និងបញ្ហាលទ្ធិប្រជាធិបតេយ្យនៅកម្ពុជា ខណៈការបោះឆ្នោតឃុំ-សង្កាត់អាណត្តិថ្មី នៅថ្ងៃទី៥ ខែមីនា ឆ្នាំ២០២២ ជិតមកដល់។
លោក ផៃ ស៊ីផាន បានលើកយក «កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិរយៈពេល១០ឆ្នាំ» មកឆ្លើយតបនឹងអ្នករាយការណ៍ពិសេសរបស់អង្គការសហប្រជាតិ ដែលបង្ហាញក្តីបារម្ភចំពោះបញ្ហាសិទ្ធិមនុស្ស និងបញ្ហាលទ្ធិប្រជាធិបតេយ្យនៅកម្ពុជា។ លោក លើកឡើងថា កម្ពុជា បានកសាងប្រជាធិបតេយ្យរយៈពេល១០ឆ្នាំ នៅថ្នាក់ក្រោមជាតិរួចមកហើយ។
«កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិរយៈពេល១០ឆ្នាំ» បានឈានដល់ដំណាក់កាលទី២។ «កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិរយៈពេល១០ឆ្នាំ ដំណាក់កាលទី១ ពីឆ្នាំឆ្នាំ២០១០ ដល់២០១៩» ត្រូវបានបញ្ជប់នៅឆ្នាំ២០១៩។ នៅចុងខែមីនា ឆ្នាំ២០២២ រដ្ឋាភិបាលកម្ពុជា បានប្រកាសដាក់ឲ្យអនុវត្ត «កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិរយៈពេល១០ឆ្នាំ ដំណាក់កាលទី២ ពីឆ្នាំឆ្នាំ២០២១ ដល់២០៣០»។
លោក ផៃ ស៊ីផាន បរិយាយទៀតថា កម្ពុជា មានការបង្រួបបង្រួម ហើយប្រជាពលរដ្ឋ រស់នៅក្នុងភាពសុខក្សេមក្សាន្ត។ លោក បន្តថា ទោះនិន្នាការខ្វែងគ្នាក្តី តែនៅមូលដ្ឋាន គឺភូមិ ឃុំ សង្កាត់ មានសុវត្ថិភាព។ លោក សង្ឃឹមថា ទៅថ្ងៃមុខ កម្ពុជា នឹងមានសុវត្ថិភាពនៅថ្នាក់ជាតិ ដោយមានការគោរពគ្នា ការជជែកគ្នា ការយោគយល់គ្នា និងការរួមគ្នាកសាងជោគវាសនាតែមួយទាំងអស់គ្នា។
លោក បញ្ជាក់ថា៖«ហ្នឹងជាដំណាក់កាលនីមួយៗនៃការកសាងជាតិរបស់កម្ពុជា។ បើការកសាងជាតិនេះ អត់បានលទ្ធផលទេ ខ្ញុំ ជឿថា សព្វថ្ងៃ កំពុងតែមានសង្គ្រាមហើយ មិនមែនទាំងអស់គ្នារីករាយនឹងសន្តិភាពទេ»។
អ្នករាយការណ៍ពិសេសរបស់អង្គការសហប្រជាជាតិ អំពាវនាវឲ្យអាជ្ញាធរកម្ពុជា គោរពសិទ្ធិមនុស្ស គោរពសេរីភាពជាមូលដ្ឋានក្នុងការបញ្ចេញមតិ-ការជួបប្រជុំ និងគោរពនិងច្បាប់សិទ្ធិមនុស្សអន្តរជាតិ៕