COVID-19
សុខភាព
អន្តរជាតិ
ការសិក្សា៖ ការឆ្លងជំងឺកូវីដ-១៩ បង្កើនហានិភ័យជំងឺទឹកនោមផ្អែម រូបភាព៖ Unsplash
× ក្រោយការរីករាលដាលជំងឺកូវីដ-១៩ អស់រយៈពេលជាងពីរឆ្នាំ អ្នកវិទ្យាសាស្ត្រកំពុងផ្លាស់ប្តូរការយកចិត្តទុកដាក់ ចំពោះផលវិបាករយៈពេលវែងនៃការឆ្លងជំងឺកូវីដ-១៩ ។ ថ្មីៗនេះ ការសិក្សាមួយ បានធ្វើឡើងដោយផ្ដោតទៅលើជំងឺទឹកនោមផ្អែម។ ការសិក្សាបានបង្ហាញថាអ្នកឆ្លងជំងឺកូវីដ-១៩ ប្រឈមហានិភ័យខ្ពស់កើតជំងឺទឹកនោមផ្អែមជាងអ្នកមិនធ្លាប់ឆ្លងជំងឺកូវីដ-១៩ ។
ការសិក្សាមួយដែលបានបោះពុម្ពផ្សាយលើទិនានុប្បវត្តិ Springer Link បានបង្ហាញថា អ្នកដែលបានឆ្លងជំងឺកូវីដ-១៩ កម្រិតស្រាលនៅអាល្លឺម៉ង់ ប្រឈមហានិភ័យកើតជំងឺទឹកនោមផ្អែមប្រភេទទី២ ខ្ពស់ជាងអ្នកដែលមិនធ្លាប់ឆ្លងជំងឺកូវីដ-១៩ ប្រមាណ ២៨ភាគរយ។ ចំណែកការសិក្សានៅអាម៉េរិកវិញត្រូវបានចេញផ្សាយនៅលើទិនានុប្បវត្តិវេជ្ជសាស្ត្រ The Lancet បានរកឃើញស្រដៀងគ្នាដែរថាអ្នកដែលបានជាពីជំងឺកូវីដ-១៩ បង្កើនហានិភ័យ ៤០ភាគរយកើតជំងឺទឹកនោមផ្អែម។
ការសិក្សារបស់អាម៉េរិកក៏បានបញ្ជាក់បន្ថែមថា សូម្បីតែក្នុងចំណោមមនុស្សដែលប្រឈមហានិភ័យទាប និងគ្មានហានិភ័យកើតជំងឺទឹកនោមផ្អែមក៏ដោយ ក៏ប្រឈមហានិភ័យនៃជំងឺទឹកនោមផ្អែម ៣៨ភាគរយដែរបន្ទាប់ពីកើតជំងឺកូវីដ-១៩។ ក្រុមអ្នកស្រាវជ្រាវបានប៉ាន់ប្រមាណថាយ៉ាងហោចណាស់មនុស្ស ២នាក់ក្នុងចំណោម ១០០នាក់ដែលបានកើតជំងឺកូវីដ-១៩ នឹងកើតជំងឺទឹកនោមផ្អែម។
អត្រាហានិភ័យនៃការកើតជំងឺទឹកនោមផ្អែមត្រូវបានផ្សារភ្ជាប់ទៅនឹងភាពធ្ងន់ធ្ងរនៃការឆ្លងជំងឺកូវីដ-១៩ របស់មនុស្សម្នាក់ៗ។ មនុស្សមានហានិភ័យនៃជំងឺទឹកនោមផ្អែមកាន់តែខ្ពស់ ប្រសិនបើអ្នកនោះបានឆ្លងជំងឺកូវីដ-១៩ កម្រិតធ្ងន់។ ចំពោះអ្នកដែលត្រូវការការព្យាបាលនៅមន្ទីរពេទ្យ ឬការសង្គ្រោះបន្ទាន់ ហានិភ័យនៃជំងឺទឹកនោមផ្អែមបានកើនឡើងកាន់តែខ្ពស់គឺ ២៧៦ភាគរយ។ វាអាចទាក់ទងទៅនឹងឱសថ Steroid ប្រឆាំងការរលាកដែលអ្នកជំងឺមួយចំនួនទទួលបានពេលព្យាបាលនៅមន្ទីរពេទ្យ ដែលអាចបង្កើនកម្រិតជាតិស្ករក្នុងឈាម។
ចំពោះកុមារហានិភ័យនៃជំងឺទឹកនោមផ្អែមដែលទើបកើតមាននាពេលបច្ចុប្បន្នកាន់តែកើនឡើងខ្លាំងទៅៗ។ របាយការណ៍ពីមជ្ឈមណ្ឌលគ្រប់គ្រង និងបង្ការជំងឺរបស់អាម៉េរិកបានរកឃើញថាកុមារទំនងជាប្រឈមហានិភ័យមានជំងឺទឹកនោមផ្អែមច្រើនជាង ២ដង បើធៀបនឹងអ្នកមិនដែលឆ្លងជំងឺកូវីដ-១៩។
តាមការសិក្សាជាច្រើន ជំងឺកូវីដ-១៩ បានបំផ្លាញកោសិកាលំពែងដែលជាអ្នកផលិតអាំងស៊ុយលីន។ ដូច្នេះបើវាត្រូវបានបំផ្លាញនោះការផលិតអាំងស៊ុយលីននឹងត្រូវរំខាន។ ដោយឡែក អាំងស៊ុយលីនមាននាទីសំខាន់ក្នុងការតម្រូវជាតិស្ករក្នុងឈាម នោះកង្វះអាំងស៊ុយលីន នឹងធ្វើឱ្យមនុស្សមានជំងឺទឹកនោមផ្អែម។ មួយវិញទៀត នៅពេលមនុស្សមានជំងឺកូវីដ-១៩ ពួកគេត្រូវនៅតែក្នុងផ្ទះដែលអាចញ៉ាំអាហារផ្សេងៗមានជាតិស្ករច្រើន ហើយអាចមិនសូវហាត់ប្រាណជាប្រចាំជាដើម។
គួរបញ្ជាក់ថា ជំងឺទឹកនោមផ្អែមអាចបណ្តាលមកពីកត្តាជាច្រើន ហើយមានជំងឺជាច្រើនដែលមានទំនាក់ទំនងជាមួយវា។ ដូច្នេះអ្នកទាំងអស់គ្នាគួរតែយកចិត្តទុកដាក់ចំពោះរបបអាហារ និងហាត់ប្រាណឱ្យបានទៀងទាត់។ ជាក់ស្ដែង អ្នកគួរប្រុងប្រយ័ត្នចំពោះជំងឺកូវីដ-១៩ ដែលអាចផ្ដល់ផលវិបាករយៈពេលវែងនៅអនាគតទាក់ទងនឹងជំងឺទឹកនោមផ្អែម៕
© រក្សាសិទ្ធិដោយ thmeythmey.com