ពីខែមករា-ខែមីនា ឆ្នាំ២០២២ កម្ពុជា​នាំទំនិញទៅកាន់ទីផ្សារប្រទេស-តំបន់នៅជុំវិញពិភពលោក សម្រេចបានក្នុងរង្វង់ទឹកប្រាក់ជាង ៥ ៧០០លានដុល្លារ។ ចំនួននេះបានកើនក្នុងអត្រា២៥,៧ភាគរយ បើធៀបនឹងរយៈពេលដូចគ្នា កាលឆ្នាំ២០២១។ ស្ថិតិទំនិញពាណិជ្ជកម្មនាំចេញេរបស់អគ្គនាយកដ្ឋានគយ និងរដ្ឋាករកម្ពុជា បានបង្ហាញថា អាម៉េរិក គឺជាទីផ្សារទំនិញលំដាប់ទី១របស់កម្ពុជា ដែលមានទំហំទឹកប្រាក់ជាង ២ ១៥០លានដុល្លារ។  

 

បន្ទាប់អាម៉េរិក ទីផ្សារលំដាប់ទី២របស់កម្ពុជា គឺប្រទេសវៀតណាម  ដែលនាំទំនិញចូលពីកម្ពុជាក្នុងតម្លៃ ​ជិត ៧៥៨លានដុល្លារ។ សម្រាប់សាធារណរដ្ឋប្រជាមានិតចិន គឺជាទីផ្សារទំនិញលំដាប់ទី៣របស់កម្ពុជា ក្នុងទំហំទឹកប្រាក់ជាង៣២០លានដុល្លារ ខណៈប្រទេសថៃជាទីផ្សារទី៤របស់កម្ពុជាដែលតម្លៃជាង៣១៨លានដុល្លារ។ 

 

ទន្ទឹមនឹងនេះ ប្រទេសជប៉ុន ក៏បាននាំចូលទំនិញពីកម្ពុជា ក្នុងរង្វង់ទឹកប្រាក់៣០៥លានដុល្លារ ផងដែរ។ ប្រទេសនេះ បានឈរនៅលំដាប់ទី៥ នៃទីផ្សារធំៗរបស់កម្ពុជា។

 

សូមជម្រាបថា រយៈពេល៣ខែ​នៃដើមឆ្នាំ២០២២ កម្ពុជាមានទំហំពាណិជ្ជកម្មប្រមាណ ១៣​ ១៦០លានដុល្លារ ដោយនៅក្នុងនោះ ប្រទេសចិន គឺមានទំហំពាណិជ្ជកម្មច្រើនជាងគេជាមួយកម្ពុជា ក្នុងរង្វង់ទឹកប្រាក់ ២​ ៨៧៣ លានដុល្លារ ខណៈជាមួយអាម៉េរិក មានក្នុងរង្វង់ ជិត ២ ២២៧លានដុល្លារ។ នេះបើយោងតាមស្ថិតិទំហំពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា៕