ក្រុម​សម្អាតឆ្នេរ Scunthorpe Litter Pickers បាន​បញ្ជាក់ថា ពួក​គេ​បានប្រទះឃើញលិខិតនៅ​ក្នុងដបមួយ នាអំឡុងពេល​ប្រតិបត្តិការសម្អាត​ឆ្នេរនៅតំបន់ Humber Estuary ក្រុង North Lincolnshire ប្រទេសអង់គ្លេស។
 

សមាជិកក្រុម​បាន​បើក​ទាញយក​លិខិតនោះមើល ហើយឃើញថា វាជាសំណេរ​ដោយ​ដៃរបស់​ក្មេងស្រី​​អាយុ​១៥​ឆ្នាំពីររូប គឺ Jennifer Coleman និង Janet Blankley។ លិខិត​ដែលចុះកាលបរិច្ឆេទ កាលពីថ្ងៃទី៩ ខែសីហា ឆ្នាំ១៩៦៦ មានខ្លឹមសារថា យុវតីទាំងពីរ​ស្វែងរកមិត្តប្រុសដែលមានអាយុពី១៦ទៅក្រោម១៨​ឆ្នាំ។

 

 

Tracey Marshall ដែលជាសមាជិក​ក្រុម​សម្អាតឆ្នេរមួយរូប បាន​រកស្វែងរកឃើញឈ្មោះ Coleman នៅលើហ្វេសប៊ុក។ Coleman ដែលបានទៅរស់នៅអូស្ត្រាលី ក្រោយបញ្ចប់ការសិក្សា បាន​បញ្ជាក់ថា ទីតាំងដែលប្រទះឃើញដបនោះ គឺមិននៅឆ្ងាយប៉ុន្មានពីទីតាំងដែលគាត់ និង Blankley បានបោះផ្សងរកគូព្រេងនោះឡើយ។

Coleman បានប្រាប់ BBC ថា៖ «ខ្ញុំគិតថា វារសាត់អណ្តែតទៅឆ្ងាយ ប៉ុន្តែតាមពិតនៅក្បែរៗទីតាំងចាស់»។ 
 

Coleman បាន​អះអាងថា បច្ចុប្បន្នគ្មានទំនាក់ទំនងអ្វីទាល់តែសោះជាមួយ Blankley ប៉ុន្តែគាត់ពិតជាសប្បាយ​ចិត្ត និងភ្ញាក់ផ្អើលចំពោះការប្រទះឃើញលិខិត​កាលពី៥៦​ឆ្នាំមុន។

គាត់បានរំលឹកថា នៅពេលនោះ គាត់ និងមិត្តភក្តិ គិតតែរករបៀបធ្វើប្លែកៗប៉ុណ្ណោះ ហើយក៏មិនទទួលបានមិត្តប្រុសតាមរយៈសារនោះដែរ ពោលគឺគាត់​រកឃើញបុរសជាទីស្រឡាញ់របស់ខ្លួន​នៅពេល​ដែលមានអាយុ៤៩​ឆ្នាំ៕