ក្រុមហ៊ុនចំនួន៣ទៀត ត្រូវបានCDC អនុម័តឱ្យបង្កើតរោងចក្រនៅកម្ពុជា​។ បើតាមCDC ក្រុមហ៊ុនទាំងនោះមាន​ក្រុមហ៊ុន ORIENT HONGYE (CAMBODIA) KNITTING CO., LTD. គ្រោងបង្កើតរោងចក្រកាត់ដេរសម្លៀកបំពាក់នៅភូមិដំណាក់ធំ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។ រោងចក្ររបស់ក្រុមហ៊ុននេះ មានតម្លៃវិនិយោគ៣លានដុល្លារ ដែលអាចបង្កើតឱកាសការងារជូនពលរដ្ឋបានជាង៥០០កន្លែង ខណៈរោងចក្រកាត់ដេរសម្លៀកបំពាក់របស់ក្រុមហ៊ុនKYLIN (CAMBODIA) SPORTS CO., LTD អាចបង្កើតការងារបានជាង៧០០កន្លែងផងដែរ។​

 

ការចុះផ្សាយរបស់CDC កាលពីថ្ងៃទី២៩មេសា ឆ្នាំ២០២២ បានបញ្ជាក់ថា ក្រុមហ៊ុនKYLIN បានបោះទុនវិនិយោគ​ជាង៥,៣លានដុល្លារ ដើម្បីបង្កើតរោងកាត់ដេរសម្លៀកបំពាក់របស់ នៅសង្កាត់រលួស ខណ្ឌដង្កោ។

 

ជាមួយគ្នានេះ CDC ក៏បានអនុញ្ញាតឱ្យក្រុមហ៊ុន SPEARHEAD COMMODITIES (CAMBODIA) CO., LTD បង្កើតរោងចក្រផលិតកាបូបគ្រប់ប្រភេទនៅភូមិរោងគោ ឃុំសំរោងទង ស្រុកសំរោងទង ខេត្តកំពង់ស្ពឺ។ បើតាមCDC ក្រុមហ៊ុននេះមានទុនវិនិយោគរហូតទៅដល់១០,៥ លានដុល្លារ ដែលបង្កើតការងារបាន៧៧៧ កន្លែង ផងដែរ៕