ក្នុងចំណោមប្រធានបទនានា ស្ថានភាពនៃប្រជាពលរដ្ឋវៀតណាម ដែលកំពុងរស់នៅលើទឹកដីកម្ពុជា ក៏ត្រូវបានមេដឹកនាំវៀតណាម រំលេចឡើងនៅចំពោះមុខមេដឹកនាំកម្ពុជាដែរ។ សារព័ត៌មាន Viet Nam News របស់វៀតណាម សរសេរដូច្នេះថា៖«លោកនាយករដ្ឋមន្រ្តី ផាម មិញឈិញ បានអរគុណរដ្ឋាភិបាលកម្ពុជា និងសុំឲ្យរដ្ឋាភិបាលកម្ពុជា បន្តយកចិត្តទុកដាក់លើសហគមន៍វៀតណាមនៅកម្ពុជា រួមទាំងសុំឲ្យបង្កើតលក្ខខណ្ឌដល់ពួកគេ ដើម្បីឲ្យពួកគេ អា​ចពង្រឹងភាពស្របច្បាប់ និងរក្សាលំនឹងជីវភាពរបស់ពួកគេនៅកម្ពុជា»។ 
 

គេ មិនដឹងថា នាយករដ្ឋមន្រ្តីកម្ពុជា ឆ្លើយតបយ៉ាងណា ចំពោះការស្នើសុំរបស់នាយករដ្ឋមន្រ្តីវៀតណាមខាងលើនោះទេ ដ្បិតថា ក្នុងអត្ថបទរបស់សារព័ត៌មាន Viet Nam News ពុំមានឃើញសរសេរពីការឆ្លើយតបរបស់នាយករដ្ឋមន្រ្តីកម្ពុជាត្រង់កន្លែងនេះឡើយ។  
 

សូមបញ្ជាក់ថា ប្រមុខរដ្ឋាភិបាលកម្ពុជា ក្នុងឋានៈជាប្រធានអាស៊ានឆ្នាំ២០២២នេះ បានដឹកនាំគណៈប្រតិភូ ទៅដល់សហរដ្ឋអាម៉េរិក នៅថ្ងៃទី១០ ខែឧសភា ដើម្បីចូលរួមកិច្ចប្រជុំកំពូលអាស៊ាន-អាម៉េរិក។ ក្រៅពីជំនួបផ្លូវការនានា មេដឹកនាំកម្ពុជា ក៏បានជួបសំណេះសំណាលជាមួយប្រជាពលរដ្ឋខ្មែរមួយចំនួន ដែលកំពុងរស់នៅលើទឹកដីសហរដ្ឋអាម៉េរិកផងដែរ៕