ជាតិ
សេដ្ឋកិច្ច
លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ រូបថត៖ CSX
×![]()
ភ្នំពេញ៖ រាជរដ្ឋាភិបាល នឹងចាប់ផ្តើមបោះផ្សាយលក់មូលបត្របំណុល នៅក្នុងឆ្នាំ២០២២។ នេះជាការលើកឡើងរបស់លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយបញ្ជាក់ថា មូលបត្របំណុលរដ្ឋនេះ គឺជាឧបករណ៍ហិរញ្ញវត្ថុថ្មីមួយ ដែលផ្តល់ជម្រើសឱ្យអ្នកវិនិយោគ និងបើកលទ្ធភាពដល់រដ្ឋក្នុងការកៀរគរទុនក្នុងស្រុក ដើម្បីអភិវឌ្ឍន៍សេដ្ឋកិច្ច។
លោក អូន ព័ន្ធមុនីរ័ត្ន បានបញ្ជាក់ថា រដ្ឋាភិបាលគ្រោងបោះផ្សាយលក់មូលបត្របំណុល នៅឆ្នាំ២០២២ ដើម្បីបង្កើតនូវប្រភពហិរញ្ញប្បទានថ្មីមួយទៀត សម្រាប់ការកៀរគរទុនរបស់រដ្ឋ។ លោកបន្តថ្លែង ក្នុងសន្និសីទជាតិស្តីពីទីផ្សារមូលបត្រកម្ពុជា៖ «មួយទសវត្សរ៍នៃការអភិវឌ្ឍទីផ្សារមូលបត្រកម្ពុជា និងដំណើរឆ្ពោះទៅមុខ» កាលពីថ្ងៃទី ១៦ឧសភាថា ការសម្រេចបោះផ្សាយមូលបត្រនេះ គឺដូចជាបង្កើតឧបករណ៍ហិរញ្ញវត្ថុថ្មី សម្រាប់វិនិយោគិននៅក្នុងទីផ្សារមូលបត្រ ជាពិសេសស្ថាប័នរកស៊ីនៅកម្ពុជា រួមមាន ធនាគារ ក្រុមហ៊ុនធានារ៉ាប់រង, មូលនិធិសោធននិវត្តន៍,មូលនិធិសន្តិសុខសង្គមជាដើម។
សម្រាប់ឧបករណ៍ហិរញ្ញវត្ថុថ្មីនេះ លោកឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដាក់ក្តីរំពឹងថា៖ «នឹងទទួលបានការពេញនិយមសម្រាប់ការជួញដូរនៅក្នុងផ្សារមូលបត្រកម្ពុជា និងផ្តល់នូវទិន្នន័យ Benchmark សម្រាប់ការជួញដូរមូលបត្រសាជីវកម្ម និងការវិភាគហិរញ្ញវត្ថុនានា ដូចត្រូវបានអនុវត្តនៅក្នុងប្រទេសដែលមានវិស័យមូលបត្ររីកចម្រើន»។
រយៈពេល១០ឆ្នាំនៃការបង្កើតផ្សារមូលបត្រកម្ពុជា(CSX) គឺមានក្រុមហ៊ុនចំនួន១៦បានចុះបញ្ជី។ លោក ហុង សុហួរ អគ្គនាយកផ្សារមូលបត្រកម្ពុជា បានបញ្ជាក់ថា ក្នុងចំណោមក្រុមហ៊ុនទាំងនេះ គឺមាន៩ក្រុមហ៊ុន ចុះបញ្ជីបោះផ្សាយលក់ភាគហ៊ុន និង៦ក្រុមហ៊ុនទៀតចុះបញ្ជីបោះលក់មូលបត្របំណុល ឬ សញ្ញបណ្ណ។
លោក ហុង សុហួរ អគ្គនាយកផ្សារមូលបត្រកម្ពុជា។ រូបថត៖ CSX
បច្ចុប្បន្នក្រុមហ៊ុនទាំងនេះ កៀរគរទុនវិយោពីផ្សារមូលបត្រ បាន២៨១លានដុល្លារ។ លោក ហុង សុហួរ បាននិយាយថា ៖ «ទោះបីជាផ្សាររបស់យើងនៅមានទំហំតូច បើធៀបនឹងប្រទេសជិតខាង និងប្រទេសដទៃ។ ប៉ុន្តែមួយទស្សវត្សរ៍មកនេះ យើងសម្រេចបាននូវសមិទ្ធជាច្រើន ដែលសមិទ្ធទាំងនេះ គឺជាឧត្តមប្រយោជន៍ ដល់ក្រុមហ៊ុន ម្ចាស់អាជីវកម្ម វិនិយោគិន ក៏ដូចជាបានរួមចំណែកក្នុងកម្រិតណាមួយនៃការគាំទ្រដល់កំណើនសេដ្ឋកិច្ចជាតិ»។
បើតាមលោក ហុង សុហួរ ចាប់តាំងឆ្នាំ២០១៩មក ទំហំជួញដូរក្នុងផ្សារមូលបត្រកម្ពុជា គឺមានកើនឡើងយ៉ាងខ្លាំង ដោយជាមធ្យមមានទំហំទឹកប្រាក់ ជិត១៦ម៉ឺនដុល្លារក្នុងមួយថ្ងៃ។ ប៉ុន្តែការជួញដូរប្រចាំថ្ងៃនេះ បានធ្លាក់មកនៅត្រឹម១១ម៉ឺនវិញ ក្នុងឆ្នាំ២០២០ ព្រោះតែវិបត្តិកូវីដ-១៩។ ការជួញដូរផ្សារមូលបត្រនេះ បានកើនដល់ជិត៣០ម៉ឺនដុល្លារក្នុងមួយថ្ងៃ សម្រាប់ឆ្នាំ២០២២១ ហើយបន្តកើនដល់រង្វង់ ១លានដុល្លារក្នុងមួយថ្ងៃ នារយៈពេល៤ខែ ដើមឆ្នាំ២០២២។ អគ្គនាយកផ្សារមូលបត្រកម្ពុជារូបនេះ បានរំឭកថា កាលឆ្នាំ២០១៨ ទំហំជួញដូរក្នុងផ្សារមូលបត្រប្រចាំថ្ងៃ មានត្រឹម២ម៉ឺនដុល្លារ ឬក្រោមនេះប៉ុណ្ណោះ។
ជាមួយគ្នានេះ លោក ស៊ូ សុជាតិ អគ្គនាយកនៃនិយ័តករមូលបត្រកម្ពុជា (SERC) បានលើកឡើងថា មកទល់បច្ចុប្បន្ន SERC បានផ្តល់អត្តសញ្ញាណវិនិយោគិនជាង ៣,១ម៉ឺនអត្តសញ្ញាណ ក្នុងនោះមានវិនិយោគិនជាស្ត្រីចំនួន ៣៤ភាគរយ និងមានវិនិយោគិនសញ្ជាតិខ្មែរសរុប ៨៦ភាគរយ។
លោក ស៊ូ សុជាតិ អគ្គនាយកនិយ័តករមូលបត្រកម្ពុជា។ រូបថត៖ CSX
លោកបន្តថ្លែងយ៉ាងដូច្នេះ៖ «ចំនួនវិនិយោគិន មានការកើនឡើងយ៉ាងគំហុកនៅក្នុងឆ្នាំ២០១៨ និង២០១៩ ដែលជាឆ្នាំ ផ្សារយើងចាប់ផ្តើមមានការវិវត្តដ៏ល្អមួយ»។
សូមជម្រាបថា ផ្សារមូលបត្រកម្ពុជា ត្រូវបានបើកឱ្យដំណើរការជួញដូរមូលបត្រជាលើកដំបូងនៅថ្ងៃទី ១៨ ខែមេសា ឆ្នាំ២០១២ ហើយរដ្ឋាករទឹកស្វយ័តក្រុងភ្នំពេញ គឺជាសហគ្រាសសាធារណៈដំបូងគេ ដែលបោះផ្សាយលក់ភាគហ៊ុន៕
Tag:
មូលបត្របំណុល
លោក អូន ព័ន្ធមុនីរ័ត្ន
© រក្សាសិទ្ធិដោយ thmeythmey.com
