រថយន្ត
អន្តរជាតិ
Mercedes 300 SLR Coupé ដែលទាក់ទាញដូចគំនូរ Mona Lisa លក់បានក្នុងតម្លៃ១៤២លានដុល្លារ
×![]()
ដោយ: ធីតា
រថយន្ត Mercedes 300 SLR Coupé មួយគ្រឿង លក់បានក្នុងតម្លៃ១៣៥លានអឺរ៉ូ (១៤២លានដុល្លារអាម៉េរិក) នៅក្រុង Stuttagart កាលពីពេលថ្មីៗកន្លងមកនេះ។ វាក្លាយជារថយន្តដែលលក់បានថ្លៃជាងគេលើពិភពលោក។
ម៉ូដែល Mercedes 300 SLR Coupé "Uhlenhaut" នេះ ជារថយន្តគំរូមួយក្នុងចំណោមរថយន្តគំរូតែពីរប៉ុណ្ណោះដែលត្រូវបានផលិតឡើងនៅឆ្នាំ១៩៥៥។ កាលពីថ្ងៃទី៥ ខែឧសភា ឆ្នាំ២០២២ អ្នកចូលចិត្តសន្សំទុករថយន្តម្នាក់ដែលមិនបានបញ្ចេញឈ្មោះ បានចំណាយដល់ទៅ១៤២លានដុល្លារក្នុងការទិញរថយន្តនេះ ដោយបំបែកកំណត់ត្រារបស់រថយន្ត Ferrari 250 GTO ឆ្នាំ១៩៦២ ដែលមានតម្លៃ៧៨លានដុល្លារ។
យោងតាមការផ្សាយរបស់សារព័ត៌មានយានយន្ត Hypebeast រថយន្ត Mercedes 300 SLR Coupé នេះ ត្រូវបានគេប្រៀបប្រដូចទៅនឹងផ្ទាំងគំនូរ Mona Lisa យ៉ាងដូច្នោះដែរ ដោយសារភាពស្រស់ស្អាតដ៏ទាក់ទាញរបស់វា។
ប្រភពព័ត៌មានពី Autocar និង Automobil Revue របស់ស្វីស ក៏បានបញ្ជាក់ផងដែរថា Mercedes 300 SLR Coupé មួយគ្រឿងនេះ មិនបានឆ្លងកាត់ការលក់ដូរនោះឡើយ។ អ្នកជំនាញមួយរូប បានអះអាងថា វាមិនមែនជារថយន្តសម្រាប់លក់ឡើយ វាជាប្រភេទរថយន្តប្រឆាំងដែលប្រើប្រាស់ដើម្បីសាកល្បងនៅលើផ្លូវថ្នល់។
មុននឹងឈានដល់ការលក់ដូរផ្លូវការ ការចរចាដំណើរការរហូតដល់ទៅប្រមាណ១៨ខែ។ ម្ចាស់រថយន្តបានបញ្ជាក់ថា គាត់នឹងដាក់តាំងបង្ហាញរថយន្តរបស់ខ្លួននៅក្នុងព្រឹត្តិការណ៍ជាក់លាក់ណាមួយ ដោយលោកមិនមែនទិញដើម្បីយកទៅទុកចោលនោះឡើយ។
ទស្សនាវដ្តីយានយន្ត Automobile Magazine របស់បារាំង បានបញ្ជាក់ថា មូលនិធិ Mercedes-Benz អន្តរជាតិ ក៏នឹងប្រើប្រាស់ថវិកាការលក់រថយន្ត ដើម្បីជួយដល់ក្រុមយុវជនដែលស្រាវជ្រាវផ្នែកវិទ្យាសាស្ត្រ បរិស្ថាន និងការកាត់បន្ថយកាបូនផងដែរ៕
© រក្សាសិទ្ធិដោយ thmeythmey.com
