បំណែកទាំងពីរនោះ ជាបំណែកក មានទំហំ ៦សង់ទីម៉ែត្រ គុណនឹង ១១សង់ទីម៉ែត្រ ឯតួខ្លួនមានកម្ពស់ ១២សង់ទីម៉ែត្រ។ អ្នកជំនាញបានសន្និដ្ឋានថា បំណែកលោហៈដែលរកឃើញនោះ ជាវត្ថុតង្វាយចំពោះទេពភៃសជ្យគុរុ (គ្រូនៃថ្នាំ​ ឬគ្រូនៃស្ដេចថ្នាំ) ដែលមានតម្កល់ក្នុងអរោគ្យសាលា ឬប្រាសាទតូច ដែលជាហោបន់ស្រន់របស់មន្ទីរពេទ្យ។


ផែនទី ទីតាំងរកឃើញបំណែកវត្ថុបុរាណ។ រូបភាពពីទំព័រហ្វេសប៊ុក អាជ្ញាធរជាតិព្រះវិហារ។

លោក ផេង សំអឿន អគ្គនាយករងអាជ្ញាធរជាតិព្រះវិហារ ប្រាប់សារព័ត៌មានថ្មីៗ២៥ថា បំណែកវត្ថុលោហៈខាងលើនេះ ត្រូវបានមន្ត្រីអាជ្ញាធរជាតិព្រះវិហារ ប្រទះឃើញចៃដន់ នៅក្បែរប្រាសាទតូច នៅជើងភ្នំប្រាសាទព្រះវិហារ ក្នុងតំបន់ទី២ នៃរមណីយដ្ឋានប្រាសាទព្រះវិហារ កាលពីថ្ងៃទី២០ ខែឧសភា ឆ្នាំ២០២២។ 
 

លោក ផេង សំអឿន អះអាងថា បច្ចុប្បន្នបំណែកវត្ថុខាងលើនេះ ត្រូវបានអ្នកជំនាញ យកទៅរក្សាទុកបណ្ដោះអាសន្ននៅសារមន្ទីរធម្មជាតិសាកលសម្ដេចតេជោ ហ៊ុន សែន ព្រះវិហារ ដើម្បីត្រៀមបញ្ជូនមកកាន់ សារមន្ទីរជាតិ ភ្នំពេញ ដើម្បីសិក្សាលម្អិតបន្ថែម ៕