ក្រោយប្រកាសទទួលស្គាល់នេះ សម្ដេច ហ៊ុន សែន ក៏បានបញ្ជាឱ្យរដ្ឋមន្ត្រីដែនដី និងអាជ្ញាធរពាក់ព័ន្ធ ក្នុងខេត្តទាំង៦ នៅជុំវិញបឹងទន្លេសាប ដែលទទួលខុសត្រូវលើកិច្ចការងារនេះ ត្រូវឆ្វៀលដីឱ្យប្រជាពលរដ្ឋ តាមការសម្រេចរបស់រដ្ឋាភិបាល។ បើតាមសម្ដេច ហ៊ុន សែន ប្រជាពលរដ្ឋ ដែលមានសិទ្ធិទទួលដីពីរដ្ឋាភិបាល លុះតែពួកគេរស់នៅ និងបង្កបង្កើនអាស្រ័យផលនៅទីនោះ ចាប់ពីរយៈពេល១០ឆ្នាំឡើងទៅ។ ចំណែកពលរដ្ឋដែលទើបកាប់ទន្ទ្រានដីព្រៃលិចទឹកថ្មីៗ ដើម្បីធ្វើជាកម្មសិទ្ធិខ្លួននោះ រដ្ឋាភិបាល រឹបអូសយកវិញហើយ មិនប្រគល់ឱ្យពួកគេឡើយ។ សម្រាប់ដីដែលរដ្ឋរឹបអូសពីការទន្ទ្រាននេះ អភិបាលខេត្ត និងអាជ្ញាធរពាក់ព័ន្ធទាំងអស់ ត្រូវដាំដើមឈើឡើងវិញផងដែរ។

 

«ត្រូវតែឆ្វៀល(ដី)ចេញ តំបន់២ក្តី តំបន់៣ក្តី ដែលប្រជាជនបានរស់នៅ ជាភូមិករណ៍ មានសាលារៀនមានទាំងវត្តអារ៉ាម ជាយូរយាណាស់មកហើយ ហើយមិនអាចចាត់ទុកតំបន់៣ ត្រូវតែបោសសម្អាតប្រជាជន ហើយយកប្រជាជនចេញពីតំបន់នោះទេ។ នេះជាបទបញ្ជា ដែលព្រះករុណាខ្ញុំធ្វើ ដើម្បីចៀសវាងការភ័ន្តច្រឡំណាមួយ ទាក់ទងនឹងការបណ្ដេញចេញ ឬយកចេញប្រជាជនដែលរស់នៅក្នុងតំបន់៣ ទៅតាមផែនទី ដែលយើងបានកំណត់នោះដែរ។ ចំណុចនេះ ជាចំណុចដែលត្រូវចៀសវាង» ។ នេះបើតាមសម្ដេច ហ៊ុន សែន ដែលត្រៀមកែសម្រួលរៀបចំព្រំប្រទល់តំបន់បឹងទន្លេសាបឡើងវិញ។ 
 

តំបន់បឹងទន្លេសាប បែងចែកជាបី គឺតំបន់រស់នៅរបស់ប្រជាជន ដែលអាចចុះបញ្ជីដីធ្លី និងផ្ដល់កម្មសិទ្ធិកាន់កាប់ដល់ប្រជាពលរដ្ឋ។ ឯតំបន់មួយទៀត ដែលរដ្ឋាភិបាលបានកំណត់ជាតំបន់១ តំបន់២ និងតំបន់៣ ដែលទុកសម្រាប់ប្រជាពលរដ្ឋចូលទៅអាស្រ័យផល ប៉ុន្តែជាកម្មសិទ្ធិរបស់រដ្ឋ។ ដោយឡែកតំបន់ចុងក្រោយ គឺជាតំបន់ព្រៃលិចទឹក ដែលត្រូវតែការពារ និងអភិរក្សដាច់ខាត។