រថយន្ត
អន្តរជាតិ
ក្រោយស្ងាត់កូវីដ-១៩ ទីផ្សារយានយន្តអាស៊ានកើនឡើង២៣ភាគរយនៅត្រីមាសទីមួយ
× ត្រីមាសទីមួយនៃឆ្នាំ២០២២ ទីផ្សារធំៗចំនួន៦ក្នុងតំបន់អាស៊ាន មានសញ្ញាវិជ្ជមាន ក្រោយការស្ងប់ទៅវិញនៅកូវីដ-១៩។ ទិន្នន័យរបស់ Asia Motor Business បានបង្ហាញឲ្យឃើញថា តួលេខលក់ចេញកើនឡើង២៣ភាគរយ។
ទិន្នន័យដែលអង្គភាព Asia Motor Business ប្រមូលពីឧស្សាហកម្មផ្សេងៗ រួមមានរោងចក្រយានយន្ត សមាគមពាណិជ្ជកម្ម និងស្ថាប័នជំនាញនានារបស់រដ្ឋាភិបាល បង្ហាញថា ការលក់យានយន្តមានការកើនឡើង២៣ភាគរយនាត្រីមាសទីមួយឆ្នាំ២០២២ ដោយកើនពី៦៧៧ ៣៩៧គ្រឿងនារយៈពេលដូចគ្នាឆ្នាំ២០២១ មក៨៣២ ៣៩០គ្រឿង។
ឥណ្ឌូណេស៊ី មានកំណើនខ្ពស់ជាងគេក្នុងចំណោមប្រទេសទាំង៦ ដោយការលក់ចេញកើនជាង៤១ភាគរយ ដោយមាន ២៦៣ ៨២២គ្រឿង។ ថៃ កើន២២ភាគរយ ជាមួយនឹងការលក់ចេញ ២៣១ ១៨៩គ្រឿង ខណៈម៉ាឡេស៊ី កើន១៥ភាគរយ ដោយលក់បាន១៥៩ ៧៥២គ្រឿង។
វៀតណាម ដែលមានកំណើតលក់ចេញ២៦ភាគរយនោះ បានបញ្ចេញរថយន្តនៅលើទីផ្សារចំនួន ៩២ ៥២៥គ្រឿង ខណៈហ្វីលីពីន មានកំណើន៦ភាគរយ ជាមួយនឹងរថយន្ត ៧៤ ៧៥៤គ្រឿង ប៉ុន្តែទិន្នន័យពីបណ្តាសមាគមនាំចេញមួយចំនួន មិនត្រូវបានរាប់បញ្ចូលឡើយ។
សិង្ហបុរី ជាទីផ្សារធំតែមួយគត់ក្នុងចំណោម៦របស់អាស៊ាន ដែលមានទិន្នន័យលក់ចេញធ្លាក់ចុះ ពោលគឺមានរហូតដល់ទៅ៤៣ភាគរយ ដោយមានចំនួនតែ១០ ៤១៣គ្រឿងប៉ុណ្ណោះនៅត្រីមាសទីមួយ។ ទោះបីជាយ៉ាងណាក៏ដោយ បណ្តាសហគ្រាសយានយន្តក្នុងតំបន់ នៅតែវាយតម្លៃវិជ្ជមាននាពេលអនាគត ពោលគឺការផុតរលត់នៃកូវីដ-១៩ និងការសាបរលាបនៃវិបត្តិរុស្ស៊ី-អ៊ុយក្រែន។
សរុបជារួម ការលក់រថយន្តចេញនាត្រីមាសទីមួយនៅទីផ្សារឥណ្ឌូណេស៊ី, ថៃ, ម៉ាឡេស៊ី, វៀតណាម, ហ្វីលីពីន និងសិង្ហបុរី មានចំនួន ៨៣២ ៤៥៥គ្រឿង ដោយកើន២៣ភាគរយ បើប្រៀបធៀបនឹងរយៈពេលដូចគ្នា កាលពីឆ្នាំ២០២១៕
© រក្សាសិទ្ធិដោយ thmeythmey.com