លោក ហង្ស ពុទ្ធា បានឱ្យដឹងថា គ.ជ.ប ទុកពេលឱ្យគណៈកម្មការរៀបចំការបោះឆ្នោតថ្នាក់ឃុំសង្កាត់ ដោះស្រាយបណ្ដឹងនោះ តែបើការដោះស្រាយត្រឹមថ្នាក់ឃុំ-សង្កាត់ មិនសម្រេចលទ្ធផល ទើបពាក្យបណ្ដឹងទាំងនោះ នឹងត្រូវបញ្ជូនទៅ គ.ជ.ប ដើម្បីស្វែងរកចំណុចមិនប្រក្រតី និងដោះស្រាយបញ្ចប់។
 

អ្នកនាំពាក្យ គ.ជ.ប រូបនេះ បានប្រាប់សារព័ត៌មានថ្មីៗ តាមទូរស័ព្ទ នាព្រឹកថ្ងៃទី ០៧ ខែមិថុនាបែបនេះ​៖ « ពេលលទ្ធផលបឋមចេញហើយ មិនសុខចិត្តគឺ គេដាក់ពាក្យបណ្ដឹង ហើយប្ដឹងត្រឹមម្សិលមិញថ្ងៃទី ៦មិថុនា ម៉ោង១២។ បើប្ដឹងរួចខាងឃុំសង្កាត់គាត់ដោះស្រាយរយៈពេល ៣ថ្ងៃ»។
 

ទាក់ទិននឹងការដោះស្រាយពាក្យបណ្ដឹងនេះ គឺពិនិត្យមើលទៅតាមការប្ដឹងនីមួយៗ ពោលគឺបានន័យថា បើបណ្ដឹងពាក់ព័ន្ធនឹងការរាប់សន្លឹកឆ្នោតមិនត្រឹមត្រូវ ហើយមានករណីកើតឡើងចាំបាច់ ឬមិនមានការស្រុះស្រួលគ្នា នៅថ្នាក់ក្រោមនេះ គឺអាចឈានដល់ការរាប់សន្លឹកឆ្នោតនៅទីតាំងនោះ ម្ដងទៀត ។ លោក ពុទ្ធា លើកឡើងបែបនេះ។
 

ដោយឡែកជុំវិញសន្លឹកឆ្នោតមិនបានការ លោក ហង្ស ពុទ្ធា ពុំទាន់អាចប្រាប់ពីទិន្នន័យជាក់លាក់បាននោះទេ ព្រោះ គ.ជ.ប កំពុងផ្ទៀងផ្ទាត់។
 

សូមជម្រាបថា ប្រជាពលរដ្ឋដែលបានទៅ​បោះឆ្នោតឃុំសង្កាត់ អាណត្តិទី៥ ឆ្នាំ២០២២  មានចំនួន ៧ ៣៨២ ៤៤៩នាក់ ស្មើ ៨០.១៩ភាគរយ នៃចំនួនអ្នកមានឈ្មោះក្នុងបញ្ជីបោះឆ្នោតសរុប​ជាង ៩លាន ​២​សែន​នាក់។
 

កាលពីឆ្នាំ២០១៧ ការរៀបចំការបោះឆ្នោតក្រុមប្រឹក្សា ឃុំ សង្កាត់ អាណត្តិទី៤ សន្លឹកឆ្នោតមិនបានការមានជាង ១០ភាគរយ។ ករណីនោះ ភាគច្រើនប្រជាពលរដ្ឋមិនជ្រើសរើសយកគណបក្សនយោបាយណាមួយ ហើយគូសចោល និងគូសឱ្យខូចសន្លឹកឆ្នោត៕