ការចេញសេចក្តីបំភ្លឺរបស់គ.ជ.ប នាពេលនេះ គឺដើម្បីឆ្លើយតបនឹងការទិតៀនរបស់គណបក្សភ្លើងទៀន ជុំវិញការរាប់សន្លឹកឆ្នោត។ តាមរយៈសេចក្តីថ្លែងការណ៍ នៅថ្ងៃទី៦ ខែមិថុនា ឆ្នាំ២០២២ គណបក្សភ្លើងទៀន លើកឡើងថា ស្ទើរគ្រប់មណ្ឌលបោះឆ្នោតនៅទូទាំងប្រទេស ត្រូវបិទទ្វាររបងចាប់ពីម៉ោង៣រសៀល ហើយបណ្តេញប្រជាពលរដ្ឋចេញមិនឲ្យនៅតាមដានការរាប់សន្លឹកឆ្នោត។ 
 

គណបក្សភ្លើងទៀតន បន្តថា ភ្នាក់ងារគណបក្សក្រៅរដ្ឋាភិបាលមួយចំនួន ក៏ត្រូវបានបណ្តេញ្ចេញឲ្យនៅក្រៅការិយាល័យបោះឆ្នោតដែរ នៅពេលការរាប់សន្លឹកឆ្នោតចាប់ផ្តើម។ គណបក្សភ្លើងទៀន បន្ថែមថា ចំពោះមន្រ្តីភូមិ-ឃុំរបស់គណបក្សប្រជាជនកម្ពុជា និងតំណាងអង្គការជាច្រើនរបស់គណបក្សដឹកនាំរដ្ឋាភិបាលនេះ បែរជាត្រូវបានផ្តល់សិទ្ធិឲ្យស្ថិតក្នុងបរិវេណមណ្ឌលបោះឆ្នោត។ 
 

គ.ជ.ប អះអាងក្នុងសេចក្តីបំភ្លឺថា ការលើកឡើងរបស់គណបក្សភ្លើងទៀន គឺខុសពីច្បាប់ បទបញ្ជា និងនីតិវិធីរបស់គ.ជ.ប។ គ.ជ.ប លើកយកច្បាប់បោះឆ្នោតមកបំភ្លឺថា បើគ្មានការអនុញ្ញាតពីគ.ជ.ប ជនគ្រប់រូប ត្រូវហាមមិនឲ្យចូលក្នុងការិយាល័យរាប់សន្លឹកឆ្នោត មុនពេលចាប់ផ្តើមការរាប់សន្លឹកឆ្នោត ឬក្រោយការរាប់សន្លឹកឆ្នោត។ 

យ៉ាងណា គ.ជ.ប ជំរុញឲ្យគណបក្សនយោបាយ ដាក់បណ្តឹងទៅគ.ជ.ប ជុំវិញភាពមិនប្រក្រតីណាមួយ ដែលពួកគេសង្កេតឃើញ។ ជាមួយនេះ គ.ជ.ប ប្រកាសថា ចាំទទួលបណ្តឹងពីគណបក្សនយោបាយទាំងនោះ។ 
 

សូមបញ្ជាក់ថា ការបោះឆ្នោតឃុំ-សង្កាត់អាណត្តិទី៥ នៅថ្ងៃទី៥ ខែមិថុនា ឆ្នាំ២០២២ បានដំណើរចាប់ពី៧ព្រឹកទៅ និងត្រូវបានបិទបញ្ចប់នៅម៉ោង៣រសៀល។ ក្រោយបិទបញ្ចប់ ការិយាល័យបោះឆ្នោត បានក្លាយជាការិយាល័យរាប់សន្លឹកឆ្នោត ហើយការរាប់សន្លឹកឆ្នោត បានចាប់ផ្តើមពីក្រោយម៉ោង៣រសៀលទៅ។ ការិយាល័យបោះឆ្នោតនៅទូទាំងប្រទេស ភាគច្រើនជាសាលារៀន៕