ជាតិ
៥ខែ កម្ពុជារកបានចំណូលជាង១៧០លានដុល្លារពីការនាំចេញផលិតផលកៅស៊ូ រូបពី ក្រសួងកសិកម្ម រុក្ខាប្រមាញ់ និងនេសាទ
× ភ្នំពេញ៖ រយៈពេល ៥ខែឆ្នាំ២០២២នេះ កម្ពុជាទទួលបានចំណូលជាង ១៧០លានដុល្លារពីការនាំចេញផលិតផលកៅស៊ូទៅកាន់ទីផ្សារអន្តរជាតិ។ នេះបើយោងតាមរបាយការណ៍របស់អគ្គនាយកដ្ឋានកៅស៊ូ។
របាយការណ៍ដដែរ បញ្ជាក់ថា ចាប់ពីខែមករា ដល់ឧសភា កម្ពុជាផលិតជ័រកៅស៊ូបាន ១០៤ ៥៧៥តោន កើនឡើង ១ ៨០៩តោន ធៀបនឹងរយៈពេលដូចគ្នាឆ្នាំ២០២១ រីឯការផលិតឈើកៅស៊ូមានចំនួន ១៣ ០២៦ម៉ែត្រគូប។ ក្នុងនោះ កម្ពុជាសម្រេចនាំចេញជ័រកៅស៊ូបាន ១០៥ ០៤៨តោន កើនឡើង ២ ៦៧៤តោន និងលក់ឈើកៅស៊ូមានចំនួនសម្រេចបាន ១២ ០៨១ម៉ែត្រគូប ដោយទទួលបានចំណូលជាង ១៧០លានដុល្លារ។
ចំពោះខែឧសភា កម្ពុជាទទួលបានចំណូលជិត ៤២លានដុល្លារ ពីការនាំចេញផលិតផលកៅស៊ូ ២ ៥៦៩០តោន កើនឡើង ៨ ១៧១តោន ធៀបនឹងខែមេសា និងកើនឡើង ៣៨៧តោន ធៀបនឹងរយៈពេលដូចគ្នាឆ្នាំ ២០២១។ មកដល់ពេលនេះ តម្លៃជ័រកៅស៊ូជាមធ្យមចំនួន ១ ៦០៤ដុល្លារក្នុងមួយតោន ថយចុះ ៧១ដុល្លារ ធៀបនឹងរយៈពេលដូចគ្នាឆ្នាំ២០២១។
គិតត្រឹមឆ្នាំ ២០២១ កម្ពុជាមានផ្ទៃដីកៅស៊ូជាង ៤០ម៉ឺនហិកតា ក្នុងនោះឧស្សាហកម្មកៅស៊ូមានជាង ២៤ហិកតា និងកៅស៊ូគ្រួសារជាង ១៦ម៉ឺនហិកតា។ កម្ពុជា មានរោងចក្រ សិប្បកម្មកែច្នៃកៅស៊ូ ១៦៨កន្លែង ស្ថិតក្នុងខេត្តចំនួន ១១ ដែលមានលទ្ធភាពនាំចេញផលិតផលកៅស៊ូបានជាង ៣៧ម៉ឺនតោន ដោយទទួលបានចំណូលចំនួន ៦១០លានដុល្លារ និងចំណូលពីការនាំចេញឈើកៅស៊ូបានជាង ១,៥លានដុល្លារ៕
Tag:
កៅស៊ូ
ជ័រកៅស៊ូ
អគ្គនាយកដ្ឋានកៅស៊ូ
© រក្សាសិទ្ធិដោយ thmeythmey.com