លោក ស៊ុន​ ចាន់ថុល បានបញ្ជាក់ថា ការអភិវឌ្ឍគម្រោងទាំងនេះ ត្រូវការទុនវិនិយោគប្រមាណ៥០ពាន់លានដុល្លារ និងត្រូវអនុវត្តក្នុងរយៈពេល១០ឆ្នាំ លើការរួមចំណែកបង្កើនឧត្តមភាពប្រកួតប្រជែងវិស័យភស្តុភារកម្ម និងការដឹកជញ្ជូនកម្ពុជា។ រដ្ឋមន្រ្តីក្រសួងសាធារណការ សង្ឃឹមថា ប្រតិភូការិយាល័យសេដ្ឋកិច្ច និងពាណិជ្ជកម្មហុងកុង នឹងចាប់អារម្មណ៍លើការដាក់ទុនវិនិយោគលើគម្រោងទាំងនេះ។
  

គោលបំណងជំនួបរវាងប្រតិភូសេដ្ឋកិច្ច និងពាណិជ្ជកម្មហុងកុង និងលោក ស៊ុន ចាន់ថុល រដ្ឋមន្ត្រីក្រសួងសាធារណការនេះ ដើម្បីស្វែងយល់ឱ្យបានច្បាស់អំពីការអភិវឌ្ឍហេដ្ឋារចនាសម្ព័ន្ធ ជាមួយការវាយតម្លៃពីកាលានុវត្តភាពពាណិជ្ជកម្ម និងការវិនិយោគឱ្យបានទូលំទូលាយនៅកម្ពុជា។ 
 

តាមរយៈជំនួបនេះ លោក ស៊ុន ចាន់ថុល បានលើកឡើងពីអត្ថប្រយោជន៍ដែលកម្ពុជាទទួលបានពីគំនិត ផ្ដួចផ្ដើមខ្សែក្រវាត់ និងផ្លូវ (Belt and Road Initiative) ដែលមានគម្រោងសាងសង់ហេដ្ឋារចនាសម្ព័ន្ធជាច្រើន រួមមាន ការកសាងផ្លូវល្បឿនលឿនរាជធានីភ្នំពេញ-ក្រុងព្រះសីហនុ ដែលជាផ្លូវល្បឿនលឿនលើកដំបូងបង្អស់របស់កម្ពុជាជាដើម។
 

រដ្ឋមន្ត្រីក្រសួងសាធារណការ ក៏បានគូសបញ្ជាក់ពីវឌ្ឍនភាពនៃការរៀបចំផែនការមេភស្តុភារកម្ម ដែលនឹងត្រូវអនុម័តដោយរាជរដ្ឋាភិបាលនាពេលខាងមុខនេះផងដែរ។ 
 

សូមជម្រាបថា ហុងកុង គឺជាតំបន់ដែលមានទំហំពាណិជ្ជកម្មច្រើនលំដាប់ទី១០ ជាមួយកម្ពុជា ។ ទំហំពាណិជ្ជកម្មរវាងប្រទេសទាំងពីរ រយៈពេល៤ខែ ឆ្នាំ២០២២នេះ មានទឹកប្រាក់ ៣៧៣,១លានដុល្លារ ​។ ទំហំនេះ បានកើនឡើងរហូតដល់ ៧៦,២ ភាគរយ បើធៀបនឹងរយៈពេលដូចគ្នាក្នុងឆ្នាំ២០២១ ដែលមានទឹកប្រាក់ជាង ២១១,៧លានដុល្លារ។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕