ក្លិបបាល់ទាត់ណាហ្គាវើលដ៍ បាននាំយកខ្សែការពារចំណូលថ្មីពីក្លិបបាល់ទាត់ វិសាខា ក្នុងលក្ខខណ្ឌខ្ចីជើង ២រដូវកាល។ ជុំវិញការនាំយកខ្សែការពាកណ្តាលរូបនេះ គ្រូបង្វឹកក្លិបបាល់ទាត់ណាហ្គាវើលដ៍លោក ឃឹម បូរី ប្រាប់សារព័ត៌មានថ្មីៗ តាមរយៈ តេឡេក្រាមថា ញឹម លីហួរ ជាកីឡាករមានបច្ចេកទេស និងលក្ខខណ្ឌគ្រប់គ្រាន់ ដែលអាចចូលរួមជាមួយក្លិបបាន។
 

«មុននឹងយើងយកគាត់មកយើងបានតាមដានវីដេអូគាត់លេងកន្លងមក លក្ខខណ្ឌដែលល្អគឺកាយសម្បទារបស់គាត់ ហើយគាត់មានបច្ចេកទេស ក៏ដូចជានៅវ័យក្មេង ជាហេតុដែលនាំឲ្យយើងពិភាក្សាគ្នាសម្រេចនាំគាត់មកជួយបំពេញនូវចន្លោះខ្វះខាតនៅក្នុងដំណែងនេះផងដែរ»។ សម្តីលោក ឃឹម បូរី។
 

គ្រូបង្វឹករូបនេះ រំពឹងថា ក្រុមនឹងទទួលបានជោគជ័យ ព្រោះជើងទី១ ក្រុមរបស់លោកធ្វើបានល្អច្រើន ។ «យើងធ្វើបានល្អគួរសមសម្រាប់ជើងទី១ ហើយចំពោះការហ្វឹកហាត់រាល់ថ្ងៃនេះ ចំពោះយើងគឺតែងតែដាស់តឿនចំពោះកីឡាករ ពួកគាត់តែងតែខំប្រឹងហ្វឹកហាត់ខ្លាំង សម្រាប់ខ្លួនឯងក៏ដូចជាក្លិបផងដែរ»។ លោក បុរី បន្ថែម។
 

លីគកំពូលកម្ពុជា នឹងចាប់ផ្តើមបើកការប្រកួតឡើងវិញ បន្ទាប់ពីអាក់ខានដោយសារជម្រើសជាតិ ត្រូវប្រមូលកីឡាករប្រកួតស៊ីហ្គេមលើកទី៣១ នៅវៀតណាម និងជម្រុះ Asian Cup នៅឥណ្ឌា កន្លងមក ។ ការប្រកួតឡើងវិញ នា សប្តាហ៍ទី៨នេះ មាន៤ក្រុម ត្រូវប្រជែងគ្នា ដោយក្រុមបាល់ទាត់ណាហ្គាវើលដ៍ ជួប បឹងកេត អេហ្វស៊ីនាកីឡដ្ឋានខេមបូឌា អ៊ែរវ៉េ ថ្ងៃទី២៥ ខែមិថុនា ឆ្នាំ២០២២។ ចំណែកព្រះខ័នរាជស្វាយរៀង ជួប គីរីវង់សុខសែនជ័យ អេហ្វស៊ី ។
 

បច្ចុប្បន្ន ណាហ្គាវើលដ៍ ឈរលេខ ៣ ក្នុងតារាងពានរង្វាន់ ខេមបូឌាន ព្រីមៀរលីគ ក្រោយឆ្លងកាត់៧ប្រកួត ឈ្នះ៣ ស្មើ២ ចាញ់២ មាន១១ពិន្ទុ។ គួររម្លឹកផងដែរថា ក្លិបបាល់ទាត់ ណាហ្គាវើលដ៍ ជាម្ចាស់ជើងឯក ៣សម័យនៃពានរង្វាន់ ខាមបូឌានលីគ ឆ្នាំ២០០៧,២០០៩ និង ២០១៨ និងឈរលេខ២ ៤រដូវកាល និងឈរលេខ៣ ៤រដូវកាល៕