អន្តរជាតិ
ការសិក្សា៖ អ្នកឆ្លងជំងឺកូវីដ១៩ម្នាក់ក្នុងចំណោម៥នាក់នៅអាមេរិក មានរោគសញ្ញាយូរអង្វែង
×![]()
ដោយ: VOA
ក្រុមមន្ត្រីសុខាភិបាលអាមេរិកបាននិយាយកាលពីថ្ងៃពុធថា ពលរដ្ឋអាមេរិកាំងពេញវ័យម្នាក់ក្នុងចំណោម៥នាក់ ដែលធ្លាប់មានជំងឺកូវីដ១៩នៅតែមានរោគសញ្ញាកូវីដ១៩រយៈពេលវែង។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters ដែលស្រង់ទិន្នន័យស្ទង់មតិដែលប្រមូលបាននៅក្នុងរយៈពេល២សប្តាហ៍ដំបូង នៅក្នុងខែមិថុនានេះ។
ទិន្នន័យនេះបង្ហាញថា ជាទូទៅ មនុស្សពេញវ័យម្នាក់ក្នុងចំណោម១៣នាក់ក្នុងសហរដ្ឋអាមេរិក មានរោគសញ្ញាកូវីដ១៩រយៈពេលយូរអង្វែង គឺពីរយៈពេល៣ខែ ឬអាចយូរជាងនេះ ក្រោយពីឆ្លងជំងឺកូវីដ១៩ជាលើកដំបូង។ រោគសញ្ញានេះពួកគេមិនធ្លាប់មានមុនឆ្លងជំងឺកូវីដ១៩នោះទេ។
ទិន្នន័យនេះត្រូវបានប្រមូលពីថ្ងៃទី១ដល់ថ្ងៃទី១៣ ខែមិថុនាកន្លងទៅ ដោយការិយាល័យជំរឿនរបស់សហរដ្ឋអាមេរិក ហើយត្រូវបានសិក្សាវិភាគដោយមជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក ឬCDC ។
រោគសញ្ញាជំងឺកូវីដរយៈពេលវែងរួមមាន ការអស់កម្លាំងខ្លាំង សង្វាក់បេះដូងលោតញាប់ ថប់ដង្ហើម ការឈ្លាសវៃចុះខ្សោយ មានការឈឺចាប់រ៉ាំរ៉ៃ អារម្មណ៍មិនប្រក្រតី និងសាច់ដុំខ្សោយជាដើម។ អាការៈរោគទាំងនោះមិនធូរស្រាលនោះឡើយ ហើយអាចមានរយៈពេលរាប់សប្តាហ៍ ឬរាប់ខែ បន្ទាប់ពីការជាឡើងវិញក្រោយការឆ្លងជំងឺកូវី១៩ជាលើកដំបូងនោះ។
ដោយឡែក ក្រុមប្រឹក្សាមជ្ឈមណ្ឌលគ្រប់គ្រងនិងបង្ការជំងឺរបស់សហរដ្ឋអាមេរិក កាលពីថ្ងៃពុធបានផ្តល់អនុសាសន៍ឱ្យមនុស្សអាយុចាប់ពី ៦៥ ឆ្នាំឡើងត្រូវចាក់ថ្នាំបង្ការជំងឺគ្រុនផ្តាសាយកម្រិតខ្ពស់ ឬថ្នាំដែលមានធាតុផ្សំបង្កើនប្រព័ន្ធភាពស៊ាំ។
ជាធម្មតាមជ្ឈមណ្ឌលគ្រប់គ្រងនិងបង្ការជំងឺទទួលអនុសាសន៍របស់គណៈកម្មាធិការប្រឹក្សាស្តីពីការចាក់ថ្នាំបង្ការ ប៉ុន្តែកន្លងមកគណៈកម្មាធិការនេះមិនបានណែនាំឱ្យមនុស្សចាស់ចាក់វ៉ាក់សាំងផ្តាសាយប្រភេទណាមួយទេ។ មជ្ឈមណ្ឌលគ្រប់គ្រងនិងបង្ការជំងឺនិយាយថា មនុស្សវ័យចំណាស់មានហានិភ័យខ្ពស់នៃជំងឺធ្ងន់ធ្ងរដោយសារជំងឺគ្រុនផ្តាសាយ ហើយមានប្រព័ន្ធភាពស៊ាំខ្សោយ។
គណៈកម្មាធិការប្រឹក្សាបាននិយាយថា ខ្លួនចង់ឱ្យមនុស្សចាស់ចាក់ថ្នាំបង្ការជំងឺគ្រុនផ្តាសាយកម្រិតខ្ពស់ ឬថ្នាំបង្ការជំងឺគ្រុនផ្តាសាយបន្ថែម ប៉ុន្តែបើមិនមានជម្រើសទាំងពីរនេះទេ មនុស្សចាស់អាយុចាប់ពី ៦៥ ឆ្នាំឡើងគួរតែចាក់វ៉ាក់សាំងការពារជំងឺផ្តាសាយស្តង់ដារឱ្យខាងតែបាន៕
(ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន Reuters និង The Associated Press)
© រក្សាសិទ្ធិដោយ thmeythmey.com
