គ្រោះខ្យល់កន្ត្រាក់ នៅថ្ងៃទី២៥ ខែមិថុនា ឆ្នាំ២០២២ បានបណ្ដាលឱ្យផ្ទះពលរដ្ឋក្នុងសង្កាត់ចំនួនបី ក្រុងសិរីសោភ័ណ ខេត្តបន្ទាយមានជ័យ រងការខូចខាត។ បើតាមទំព័រហ្វេសប៊ុករដ្ឋបាលក្រុងសិរីសោភ័ណ គ្រោះមហន្តរាយខាងលើនេះ បានធ្វើឱ្យរបើកដំបូលផ្ទះពលរដ្ឋចំនួន១៣ខ្នង នៅសង្កាត់កំពង់ស្វាយ, ៤៧ខ្នង នៅសង្កាត់ព្រះពន្លា និង២ខ្នងទៀត នៅសង្កាត់អូរអំបិល។ 
 

បើតាមប្រភពព័ត៌មានដដែល ករណីខាងលើនេះ មិនបណ្ដាលឱ្យមានគ្រោះថ្នាក់ដល់មនុស្សឡើយ គឺខូចខាតតែផ្ទះពលរដ្ឋ និងបាក់រលំដើមឈើមួយចំនួនគ្របមកលើដងផ្លូវប៉ុណ្ណោះ។
 

ក្រោយហេតុការណ៍ខាងលើនេះ កងពលតូចថ្មើរជើងលេខ៥១ កងកម្លាំងចម្រុះ និងអាជ្ញាធរមូលដ្ឋាន  បានចុះជួយរុះរើ និងជួសជុលផ្ទះពលរដ្ឋរងការខូចខាតដោយខ្យល់កន្ត្រាក់ឡើងវិញផងដែរ។ នេះបើតាមទំព័រហ្វេសប៊ុក កងពលតូចថ្មើរជើងលេខ៥១។ 
 

គួររំឭកផងដែរ យោងតាមការព្យាករណ៍អាកាសធាតុ របស់ក្រសួងធនធានទឹក និងឧតុនិយម ចាប់ពីថ្ងៃទី២២ ដល់ថ្ងៃទី២៨ ខែមិថុនា កម្ពុជានឹងទទួលរងឥទ្ធិពលជ្រលងសម្ពាធទាបអូសបន្លាយពីភាគខាងជើង ប្រទេសឡាវ ថៃ និងវៀតណាម រួមជាមួយខ្យល់មូសុងនិរតី មានល្បឿនមធ្យមបង្គួរ។ ដូច្នេះតាមបណ្ដារាជធានី-ខេត្ត អាចមានភ្លៀងធ្លាក់ច្រើនដោយអន្លើ លាយឡំដោយផ្គរ រន្ទះ និងខ្យល់កន្ត្រាក់៕