រាជរដ្ឋាភិបាល នឹងអភិវឌ្ឍប្រព័ន្ធដឹកជញ្ជូនសាធារណៈឱ្យកាន់តែដែលអាចចូលរួមកាត់បន្ថយការកកស្ទះ និងគ្រោះថ្នាក់ចរាចរណ៍នៅភ្នំពេញ ប្រកបដោយប្រសិទ្ធភាព។ ក្នុងនោះ ក្រសួងសាធារណការ និងក្រុមហ៊ុនវិនិយោគធំៗរបស់ប្រទេសចិន ក្នុងការសិក្សាលទ្ធភាពក្នុងការសាងសង់ផ្លូវរថភ្លើងក្រោមដី (Subway) ឬ ផ្លូវរថភ្លើងលើអាកាស (Momorail) ដើម្បីដោះស្រាយវិបត្តិកកស្ទះចរាចរណ៍នៅភ្នំពេញ។ 

 

បើតាមក្រសួងសាធារណការ និងដឹកជញ្ជូន កាលពីថ្ងៃទី២៤មិថុនា ឆ្នាំ២០២២ លោក ស៊ុន ចាន់ថុល បានពិភាក្សាការងារ ជាមួយតំណាងក្រុមហ៊ុនសាជីវកម្មស្ពានថ្នល់ចិន(CRBC) តំណាងក្រុមហ៊ុនគមនាគមន៍ និងសំណង់ចិន (CCCC) និងមន្ត្រីបច្ចេកទេសមកពីអង្គភាពពាក់ព័ន្ធ  អំពីលទ្ធភាពសាងសង់បណ្តាញផ្លូវរថភ្លើង ដែលនឹងតភ្ជាប់ស្ទើរគ្រប់ទីតាំង ជាពិសេស តំបន់ ដែលមានដង់ស៊ីតេប្រជាជន ខ្ពស់ នៃរាជធានីភ្នំពេញ។ 

 

លោក ស៊ុន ចាន់ថុល បញ្ជាក់ថា អ្នកជំនាញរបស់ក្រុមហ៊ុនចិន បានសិក្សាអំពីផ្លូវរថភ្លើងទាំងពីរប្រភេទនេះដោយផ្អែកលើមូលដ្ឋាននៃការបៀបធៀបតម្លៃឯកតាចំណាយលើការសាងសង់, រយៈពេលនៃការសាងសាងសង់ តម្លៃប្រតិបត្តិការ និងចំណាយលើការថែទាំ...ជាដើម។ ជាមួយគ្នានេះ លោកបានជំរុញដល់ក្រុមហ៊ុនទាំងនោះត្រូវសិក្សាឱ្យបានស៊ីជម្រៅលើចំណុចដែលនៅខ្វះចន្លោះ មុននឹងដាក់ជូនរដ្ឋាភិបាលសម្រេចក្នុងការសាងសង់ផ្លូវរថភ្លើងណាមួយ នៅភ្នំពេញ។ 

 

រដ្ឋមន្ត្រីសាធារណការរូបនេះបាននិយាយថា៖ «ប្រមុខរាជរដ្ឋាភិបាល នឹងពិនិត្យសម្រេចជ្រើសរើសយកប្រព័ន្ធដឹកជញ្ជូនសាធារណៈណាមួយដែលសមស្រប និងអាចទទួលយកបាន​សម្រាប់រាជធានីភ្នំពេញ ដើម្បីដោះស្រាយបញ្ហានៃការកកស្ទះចរាចរណ៍ និងគ្រោះថ្នាក់ចរាចរណ៍ ដែលកំពុងកើតមាននាពេលបច្ចុប្បន្ននេះ»៕