ព្រឹត្តិបត្រស្ថិតិសេដ្ឋកិច្ច និងហិរញ្ញវត្ថុ របស់អគ្គនាយកដ្ឋានគោលនយោបាយ នៃក្រសួងសេដ្ឋកិច្ច និងហិរញ្ញវត្ថុបានបង្ហាញថា​ អតិផរណាមធ្យមប្រចាំត្រីមាសទីមួយ ឆ្នាំ២០២២ មានអត្រា៥,៩ភាគរយ  ធៀបនឹងរយៈពេលដូចគ្នាឆ្នាំ២០២១។  បើតាមក្រសួងសេដ្ឋកិច្ច ​ នៅក្នុងនោះសន្ទស្សន៍ថ្លៃសាច់ជ្រូក បានកើនឡើង៤,៦ភាគរយ, ត្រី៥,២ភាគរយ ខណៈឧស្ម័ន(Gas) កើន២៨ភាគរយ។ 
 

 

ជាមួយគ្នានេះ សន្ទស្សន៍ថ្លៃប្រេងសាំងធម្មតានៅកម្ពុជា ក៏បានកើនដល់​៣៧,៣ភាគរយ និងប្រេងម៉ាស៊ូត កើនដលល់ ៤៤,៤ភាគរយ ផងដែរ។ កំណើនអតិផរណានៅកម្ពុជា ដែលប៉ះពាល់ដល់វិស័យប្រេងឥន្ធនៈនេះ គឺបណ្តាលមកការរងសម្ពាធនៃ សង្រ្គាមនៅប្រទេសអ៊ុយក្រែន។

 

លោក បណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា ធា្លប់ប្រាប់សារព័ត៌មានថ្មី ៗ (ThmeyThmey) ថា កំណើននៃអតិផរណាក្នុងប្រទេសនេះ វាមិនស្របតាមចំណូលរបស់ពលរដ្ឋ ជាពិសេសអ្នកប្រកបមុខរបរសេដ្ឋកិច្ចក្រៅប្រព័ន្ធ គឺមានចំណូលធា្លក់ចុះ ដោយសារបញ្ហាប្រេងឥន្ធនៈឡើងថ្លៃ។ 

 

លោក បាននិយាយដូច្នេះ៖ «អតិផរណានេះ ធ្វើឱ្យប៉ះពាល់ដល់ការរស់នៅរបស់ពលរដ្ឋប្រចាំថ្ងៃ ប្រចាំខែ។ [បញ្ហានេះ]ផ្សំគ្នាពីមួយខែ ទៅមួយខែ ធ្វើឱ្យប៉ះពាល់ជីវភាពពិតប្រាកដរបស់ពលរដ្ឋ»។ ដើម្បីកាត់បន្ថយនូវបញ្ហាអតិផរណា ដែលបណ្តាលមកការឡើងថៃ្លនៃប្រេងឥន្ធនៈ និងកង្វះស្បៀងអាហារនាពេលខាងមុខ អ្នកជំនាញសេដ្ឋកិច្ចរូបនេះ ណែនាំដល់ពលរដ្ឋត្រូវមានផែនការចំណាយឱ្យបានត្រឹមត្រូវ ពិសេសត្រូវកាត់បន្ថយការចំណាយលើទំនិញ-សេវាណា ដែលមិនចាំបាច់នៅក្នុងជីវភាពរស់នៅប្រចាំថ្ងៃ។ 

 

បច្ចុប្បន្ន សាំងធម្មតានៅកម្ពុជាមានតម្លៃ ៥ ៨០០រៀល ក្នុងមួយលីត្រ។ រីឯ ប្រេងម៉ាស៊ូត ឡើងដល់ ៦ ៣០០រៀល ក្នុងមួយលីត្រ។ នេះជាការកំណត់តម្លៃថ្មី ដោយក្រសួងពាណិជ្ជកម្ម ដែលម្ចាស់ស្ថានីយ/ដេប៉ូប្រេងឥន្ធនៈ  នៅទូទាំងប្រទេសត្រូវអនុវត្តដល់ដំណាច់ខែមិថុនា ឆ្នាំ២០២២៕