មុនរដ្ឋមន្រ្តីការបរទេស និងសហប្រតិបត្តិការអន្តរជាតិកម្ពុជា និងប្រេសិតពិសេសអាស៊ាន លោក ប្រាក់ សុខុន បញ្ចប់ទស្សនកិច្ចមួយថ្ងៃ លោកវ៉ាង យី ប្រមុខការទូតចិន នឹងធ្វើទស្សនកិច្ចនៅមីយ៉ាន់ម៉ា​ ដើម្បីចូលរួមក្នុងកិច្ចប្រជុំថ្នាក់រដ្ឋមន្រ្តីនៃកិច្ចសហប្រតិបត្តិមេគង្គ-ឡានឆាង ដែលមានសមាជិកចំនួន ៦ប្រទេសដូចជា ចិន ថៃ ឡាវ មីយ៉ាន់ម៉ា វៀតណាម និងចិន។ នេះបើតាមការបញ្ជាក់របស់លោក Zaw Min Tun អ្នកនាំពាក្យរបបសឹកមីយ៉ាន់ម៉ា។ 

 

មីយ៉ាន់ម៉ា និងចិន នឹងធ្វើជាសហប្រធានកិច្ចប្រជុំ ដែលរៀបចំឡើងនៅក្រុងBagan ដែលជាសម្បត្តិបេតិកភណ្ឌរបស់អង្គការយូណេស្កូចាប់ពីថ្ងៃទី២ ដល់ថ្ងៃទី៥ ខែមិថុនា។ 

 

យ៉ាងណាមិញ ក្នុងកិច្ចសម្ភាសជាមួយទីភ្នាក់ងារព័ត៌មាន AFP​ លោក  Zaw Min Tun បានអះអាងថា លោក មិនប្រាកដឡើយលោកវ៉ាង នឹងជួបជាមួយឧត្តមសេនីយ៍ មីន អ៊ុងឡាំង ​ឬយ៉ាងណា។ នេះជាដំណើរទស្សនកិច្ចរបស់ប្រមុខការទូតចិនលើកដំបូងចាប់តាំងពីរដ្ឋប្រហារយោធា នៅខែកុម្ភៈ​ ឆ្នាំ២០២១។ 

 

កន្លងមក ចិន មិនធ្លាប់រិះគន់រដ្ឋប្រហារយោធានៅមីយ៉ាន់ម៉ាឡើយ ហើយថែមទាំងមិនបានដាក់ទណ្ឌកម្ម លើយោធា ដូចប្រទេសលោកខាងលិចថែមទៀត។ រដ្ឋាភិបាលក្រុងប៉េកាំង បានត្រឹមតែអំពាវនាវឱ្យភាគីនៅមីយ៉ាន់ម៉ា ចូលតុចរចា និងដោះស្រាយជម្លោះប្រកបដោយសន្តិភាពប៉ុណ្ណោះ។ មិនតែប៉ុណ្ណោះ ចិនក៏ធ្លាប់លើកឡើងពីការការពារអធិបតេយ្យ ឯករាជ្យភាព និងបូរណភាពដែនដីរបស់មីយ៉ាន់ម៉ាផង។ 

 

តាមទិន្នន័យរបស់អ្នកជំនាញអង្គការសហប្រជាជាតិ យោធាមីយ៉ាន់ម៉ា បានសម្លាប់ប្រជាជនស៊ីវិលច្រើនជាង​ ២ពាន់នាក់ ខណៈប្រជាជនប្រមាណ ៧០ម៉ឺននាក់ បានភៀសខ្លួនចេញពីផ្ទះសម្បែង ដើម្បីរកកន្លែងសុវត្ថិភាព៕