ក្រសួងពាណិជ្ជកម្មអាម៉េរិកនៅថ្ងៃទី២៨ ខែមិថុនាបានបន្ថែមអង្គភាព ឬក្រុមហ៊ុនចំនួន ៣៦ ទៀតក្រោមបញ្ជីខ្មៅពាណិជ្ជកម្មដែលមានប្រសិទ្ធភាពរឹតបន្តឹងក្រុមហ៊ុនអាម៉េរិកពីការនាំចេញទៅអង្គភាពទាំងនោះ។ ក្រុមហ៊ុនទាំង ៣៦ នេះត្រូវបានរដ្ឋាភិបាលអាម៉េរិកកំណត់ថា បានធ្វើប្រតិបត្តិការផ្ទុយទៅនឹងសន្តិសុខជាតិ ឬផលប្រយោជន៍គោលនយោបាយរបស់អាម៉េរិក។ 

 

ក្នុងចំណោមអង្គភាពទាំងនេះ គេក៏ឃើញមានក្រុមហ៊ុនចិនចំនួន៥ដែរ។ ក្រសួងពាណិជ្ជកម្មអាម៉េរិកបញ្ជាក់ថា ក្រុមហ៊ុនទាំងនេះផ្តល់ការផ្គត់ផ្គង់ក្រុមហ៊ុនការពារជាតិ និងយោធារុស្ស៊ីដែលស្ថិតក្រោមទណ្ឌកម្មអាម៉េរិក។

 

«ចំណាត់ការថ្ងៃនេះផ្ញើសារដ៏មានឥទ្ធិពលទៅកាន់អង្គភាព និងបុគ្គលនានាជុំវិញពិភពលោកថា ប្រសិនបើពួកគេស្វះស្វែងគាំទ្ររុស្ស៊ី អាម៉េរិកនឹងកាត់ផ្តាច់ពួកគេទាំងនោះដូចគ្នា»។ លោក Alan Estevez អនុរដ្ឋមន្រ្តីពាណិជ្ជកម្មទទួលបន្ទុកឧស្សាហកម្ម និងសន្តិសុខអាម៉េរិកបញ្ជាក់បែបនេះនៅក្នុងសេចក្តីថ្លែងការណ៍ថ្ងៃទី២៨ ខែមិថុនា។

 

បើតាមសេចក្តីថ្លែងការណ៍ដដែល លោកស្រី Thea Rozman Kendler ឧបការីរដ្ឋមន្រ្តីពាណិជ្ជកម្មទទួលបន្ទុកកិច្ចការរដ្ឋបាលនាំចេញ ​អះអាងថា អាម៉េរិកនឹងមិនស្ទាក់ស្ទើចាត់វិធានការដោយមិនខ្វល់ភាគីនោះស្ថិតនៅទីណាទេ​ ប្រសិនបើបុគ្គល ឬអង្គភាពនោះបំពានច្បាប់អាម៉េរិក។ 

 

បើតាមទីភ្នាក់ងារព័ត៌មាន Reuters ស្ថានទូតចិនក្នុងទីក្រុងវ៉ាស៊ីនតោន អះអាងថា ទីក្រុងប៉េកាំងមិនបានផ្តល់ជំនួយផ្នែកយោធាដល់រុស្ស៊ី ឬអ៊ុយក្រែននោះទេ។ បន្ថែមពីនេះ ស្ថានទូតចិនប្រកាសថា ខ្លួននឹងចាត់វិធានការជាចាំបាច់ដើម្បីការពារសិទ្ធិរបស់ក្រុមហ៊ុនខ្លួន ក្រោមហេតុផលថា ទង្វើរបស់អាម៉េរិកគឺបំពានច្បាប់អន្តរជាតិ៕