ការលើកឡើងរបស់លោកស្រី Dorries ធ្វើឡើងប៉ុន្មានថ្ងៃបណ្ណោះ ក្រោយពេលសហព័ន្ធកីឡាហែលទឹក (FINA)បានបោះឆ្នោតដាក់កំហិតហាមមិនឱ្យកីឡាករកែភេទ ចូលរួមប្រកួតកីឡាហែលទឹកវិញ្ញាសាររបស់ស្រ្តី។ FINA ក៏បានលើកឡើងថា ការហាមឃាត់គឺដើម្បីរក្សាសិទ្ធិស្មើគ្នានៃការប្រកួតផ្នែកបុរស និងផ្នែកស្រ្តី។
 

ការសម្រេចរបស់ FINA បែបនេះ បានធ្វើឱ្យសហព័ន្ធកីឡាធំៗលើពិភពលោករួមមាន សហព័ន្ធបាល់ទាត់ពិភពលោក (FIFA), សហព័ន្ធអត្តពលិកពិភពលោក (World Athletics) និងសហព័ន្ធបាល់ទាត់អាល្លឺម៉ង់ បានចាប់ផ្តើមត្រួតពិនិត្យឡើងវិញ អំពីច្បាប់ប្រកួតចំពោះកីឡាករដែលកែភេទ។ 
 

សរសេរក្នុងគេហទំព័រ Twitter លោកស្រី Nadine Dorries បានស្នើទៅស្ថាប័នកីឡានានាក្នុងប្រទេស ឱ្យអនុវត្តតាមគោលការណ៍នៃការប្រកួតប្រជែងកីឡារបស់ស្ត្រី គឺសម្រាប់តែមនុស្សកើតមកភេទជាស្រីប៉ុណ្ណោះ។
 

«យើងមិនអាចធ្វើពុត ហើយនិយាយថាភេទជម្រុះ នឹងមិនមានផលប៉ះពាល់ដល់ការលេងកីឡាអត្តពលិកជាស្ត្រីផ្សេងទៀតឡើយ។ បើសិនជាអ្នកសួរទៅកាន់ស្ត្រី និងនារីវ័យក្មេង ដើម្បីទៅប្រកួតប្រជែងជាមួយនរណាម្នាក់ដែលជាភេទកើតមកជាបុរស នោះគឺជារឿងមួយដែលមិនយុត្តិធម៌ឡើយ ហើយថ្ងៃនេះខ្ញុំក៏រំពឹងស្ថាប័នកីឡានិងគោរពតាមគោលការណ៍ ដែលថាកីឡារបស់ស្ត្រី គឺសម្រាប់តែមនុស្សកើតមកជាភេទស្រីប៉ុណ្ណោះ។»។ លោកស្រី Dorries បាននិយាយបែបនេះ។
 

សូមជម្រាបថា កាលពីខែមេសាកន្លងទៅលោក Boris Johnson ដែលជានាយករដ្ឋមន្ត្រីប្រទេសអង់គ្លេស ក៏ធ្លាប់បាននិយាយអំពីបញ្ហានេះម្តងរួចហើយថា លោកមិនជឿឡើយដែលកីឡាករកែភេទទៅជាស្ត្រី អាចចូលរួមប្រកួតនៅក្នុងព្រឹត្តិការណ៍របស់ស្ត្រីបាន៕