នាយកដ្ឋានប្រឆាំងបទល្មើសបច្ចេកវិទ្យា (ACCD) បានរកឃើញថា ក្រុមជនខិលខូចកំពុងតែព្យាយាមដំឡើងកម្មវិធីជំរិតទារប្រាក់ LockBit តាមរយៈអ៊ីម៉ែលដោយចោទប្រកាន់អ្នកប្រើប្រាស់ទាក់ទងទៅនឹងការបំពានរក្សាសិទ្ធិ (Copyright)។​
 

ACCD បានបន្តថា អ្នកប្រើប្រាស់ដែលទទួលបានអ៊ីម៉ែលទាំងនេះ ត្រូវបានព្រមានអំពី ការបំពានច្បាប់រក្សាសិទ្ធិ ពាក់ព័ន្ធនឹងការប្រើឯកសារដោយគ្មានអជ្ញាប័ណ្ណពីអ្នកបង្កើត។

ក្រុមជនខិលខូចទាមទារឱ្យអ្នកទទួលសារពីអ៊ីម៉ែលទាំងនេះ ដោយលុបខ្លឹមសាររំលោភបំពានចេញពីកុំព្យូទ័រ ឬគេហទំព័ររបស់ពួកគេ។ បើមិនដូច្នោះទេ នឹងប្រឈមមុខនឹងផ្លូវច្បាប់។ 
 

នៅក្នុងខ្លឹមសាររបស់អ៊ីម៉ែលជនខិលខូចមិនបានកំណត់ថា ឯកសារមួយណាត្រូវបានប្រើប្រាស់ដោយខុសច្បាប់នោះទេ ហើយទាមទារឱ្យអ្នកទទួលសារទាំងនោះ ទាញយកនិងបើកឯកសារដែលបានភ្ជាប់ដើម្បីមើលខ្លឹមសារនៃការរំលោភបំពាន។ នៅពេលដែលជនរងគ្រោះបើកឯកសារ «PDF» ដើម្បីមើលរូបភាពដែលត្រូវបានប្រើដោយខុសច្បាប់នោះ កម្មវិធីមេរោគនិងចម្លងព័ត៌មានបម្លែងទៅជាកូដ (Encrypt) របស់ជនរងគ្រោះជាមួយនឹងកម្មវិធីជំរិតទារប្រាក់ LockBit 2.0។ នេះជាការលើកឡើងបន្ថែមរបស់ ACCD ។
 

គូសបញ្ជាក់ផងដែរថា ឯកសារដែលភ្ជាប់នេះ ជាប្រភេទឯកសារហ្ស៊ីប(Zip)ដែលការពារដោយពាក្យសម្ងាត់ ហើយក្នុងនោះក៏មានឯកសារ PDF ក្លែងក្លាយ ដែលមានកម្មវិធីដំឡើង NSIS ផងដែរ។ ហេតុផលដែលជនខិលខូចទាមទារឱ្យជនរងគ្រោះប្រើលេខសម្ងាត់ដើម្បីបើកឯកសារនោះ គឺដើម្បីជៀសវាងពីប្រព័ន្ធការពារមេរោគរបស់កម្មវិធីអ៊ីម៉ែល។
 

ដូច្នេះដើម្បីសុវត្ថិភាពក្នុងការប្រើប្រាស់ឧបករណ៍បច្ចេកវិទ្យានេះ ACCD បានប្រាប់ទៅដល់សាធារណជនដែលកំពុងប្រើប្រាស់បណ្តាញសង្គម អ៊ីមែល ឬវេបសាយនានា កុំចុចនៅលើតំណភ្ជាប់ទាំងឡាយណា ដែលមិនមានប្រភពច្បាស់លាស់ ៕