គណបក្សខ្មែរស្រឡាញ់ជាតិ ដែលដឹកនាំដោយលោក ជីវ កត្តា អតីតអ្នកតំណាងរាស្ត្រគណបក្សសង្គ្រោះជាតិ ទទួល៥អាសនៈ ពីការបោះឆ្នោតក្រុមប្រឹក្សាឃុំ-សង្កាត់អាណត្តិទី៥។ នេះជាការប្រកួតប្រជែងក្នុងការបោះឆ្នោតលើកដំបូងសម្រាប់គណបក្សមួយនេះ ដោយបានកៅអីជំទប់ទី១ ចំនួន២ ជំទប់ទី២ចំនួន២ និងសមាជិក១នៅខេត្តកំពង់ចាម និងព្រៃវែង។
ក្នុងខេត្តកំពង់ចាម លោក ស៊ន រដ្ឋា នៃគណបក្សខ្មែរស្រឡាញ់ជាតិ ជាប់ជាជំទប់ទី១ នៅឃុំមេព្រីង ស្រុកបាធាយ ខណៈអ្នកស្រី ហៀង សុផល ពីគណបក្សប្រជាជនកម្ពុជា ជាមេឃុំ និងលោក ចាន់ ម៉េង ពីគណបក្សភ្លើងទៀន ជាប់ជាជំទប់ទី២។ សមាជិកពីរនាក់ទៀតមកពីគណបក្សប្រជាជនកម្ពុជា ដែលមានលោក សួន ប៉ូច និងអ្នកស្រី ស្រ៊ុន សុគុន្ធា។
នៅឃុំតាំងក្រាំង ស្រុកបាធាយ ដដែល លោក ពៅ ចាន់វាសនា ពីគណបក្សខ្មែរស្រឡាញ់ជាតិ ជាប់ជាជំទប់ទី២ ដោយលោក ចាន់ អយ ពីគណបក្សប្រជាជនកម្ពុជា ជាមេឃុំ និងលោក អ៊ុក សាយ ពីគណបក្សភ្លើងទៀន ជាជំទប់ទី១។ សមាជិក៦រូបទៀត មាន លោក ចិន សុផល, លោក ស សំអឿន, លោក គិត សុមាន, លោក ខឹម សំអុល, លោក អៀង មាច ពីគណបក្សប្រជាជនកម្ពុជា និងលោក ប៉ាន់ សយ ពីគណបក្សភ្លើងទៀន។
សម្រាប់ឃុំរាយប៉ាយ ស្រុកកងមាស ខេត្តកំពង់ចាមដូចគ្នា ដែលមាន៩អាសនៈ លោក ចឹក ជន់ មកពីគណបក្សខ្មែរស្រឡាញ់ជាតិ ជាប់ជាជំទប់ទី២ បន្ទាប់ពីលោក ហ៊ាង រ៉ាវ ពីគណបក្សប្រជាជនកម្ពុជា ជាមេឃុំ និងអ្នកស្រី ហេង ឆេងគីម ពីគណបក្សភ្លើងទៀន ជាជំទប់ទី១។ សមាជិក៦នាក់ទៀត សុទ្ធសឹងមកពីគណបក្សប្រជាជនកម្ពុជា ដែលមាន លោក សេង ប៉េងហុង, លោក វ៉ា វ៉ាត, លោក ឆាន់ ឈុន, អ្នកស្រី ម៉ាន គឿ, លោក ហោ ហ៊ិន និងលោក ហែម ចន្ថា។
នៅខេត្តព្រៃវែងឯណោះវិញ គណបក្សខ្មែរស្រឡាញ់ជាតិ ឈ្នះពីរអាសនៈ នៅឃុំកំពង់ឫស្សី ស្រុកពោធិ៍រៀង ដោយលោក ស៊ិន វុត្ថា បានតំណែងជាជំទប់ទី១ និងលោក អ៊ុក ភន ជាសមាជិក។ លោក ប្រាក់ ប៉ិច ពីគណបក្សប្រជាជនកម្ពុជា ជាមេឃុំ និងលោក ជីង អ៊ន ពីគណបក្សភ្លើងទៀន ជាជំទប់ទី២។ សមាជិក៣នាក់ទៀតសុទ្ធតែមកពីគណបក្សប្រជាជនកម្ពុជា ដែលរួមមាន លោក សុខ ផានី, លោក នួន រឿន និងអ្នកស្រី ឌុក ត្រាន។
សម្រាប់ឈរឈ្មោះក្រុមប្រឹក្សាឃុំ-សង្កាត់អាណត្តិទី៥នេះ គណបក្សខ្មែរស្រឡាញ់ជាតិ បានដាក់បេក្ខជនឈរឈ្មោះនៅឃុំ-សង្កាត់ចំនួន៣១៥ ក្នុង១៨រាជធានី-ខេត្ត។
យោងតាមលទ្ធផលផ្លូវការ គណបក្សចំនួន៩ក្នុងចំណោម១៧ បានទទួលអាសនៈក្នុងអណត្តិទី៥នេះ ដោយក្នុងចំណោម១១៦២២អាសនៈនៃ១៦៥២ឃុំ-សង្កាត់ គណបក្សប្រជាជនកម្ពុជា ទទួលបានទៅដល់ ៩៣៧៦អាសនៈ គណបក្សភ្លើងទៀន បាន ២១៩៨អាសនៈ។
គណបក្សហ៊្វុនស៊ិនប៉ិច ស្ថិតនៅលេខ៣ ដោយបាន១៩អាសនៈ បន្ទាប់មកគណបក្សខ្មែររួបរួមជាតិ បាន១៣អាសនៈ។ គណបក្សប្រជាធិបតេយ្យមូលដ្ឋាន បាន៦អាសនៈ គណបក្សខ្មែរស្រឡាញ់ជាតិ បាន៥អាសនៈ គណបក្សយុវជនកម្ពុជា បាន៣អាសនៈ គណបក្សកម្ពុជានិយម បាន១អាសនៈ និងគណបក្សសំបុកឃ្មុំសង្គមប្រជាធិបតេយ្យ បាន១អាសនៈ។
បើតាមគ.ជ.ប ពលរដ្ឋចេញទៅបោះឆ្នោត មានជិត៧,៤លាននាក់ ដែលស្មើនឹង៨០,៣២ភាគរយ ខណៈសន្លឹកឆ្នោតបានការមានជាង៧,២លានសន្លឹក និងមិនបានការមានជិត១៦ម៉ឺនសន្លឹក៕