COVID-19
ជាតិ
សម្តេច ហ៊ុន សែន៖ អ្នកយកបញ្ហាកូវីដ-១៩ ទៅលេងសើច ត្រូវប្រឈមចាប់ខ្លួន
× ផូសមួយចាប់មួយ ផូសពីរចាប់ពីរ រឿងនេះ មិនមែនជាការលេងសើចទេ! នេះជាការព្រមានរបស់សម្តេចនាយករដ្ឋមន្ត្រី ហ៊ុន សែន ចំំពោះបុគ្គលដែលយកករណីកូវីដ-១៩ទៅលេចសើច។
ប្រមុខរដ្ឋាភិបាលបានលើកឡើងយ៉ាងដូច្នេះ ពីក្នុងពិធីអបអរទិវាមច្ឆជាតិ ១កក្កដា នៅអាងត្រពាំងថ្ម ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។ កាលពីថ្ងៃម្សិលមិញ សម្តេចបានបញ្ជាក់ពីការចាប់ខ្លួនបុរសម្នាក់ដែលដាក់ឈ្មោះខ្លួនថា អ៊ូខុង ដោយបុគ្គលដែលរស់នៅខេត្តត្បូងឃ្មុំរូបនោះ បានបង្ហោះនៅលើ TikTok ដោយយកករណីស្លាប់នៅខេត្តកោះកុងជាយូរឆ្នាំ ថា ជាការករណីស្លាប់ដោយសារកូវីដ-១៩ នាពេលបច្ចុប្បន្ន។
សម្តេច ហ៊ុន សែន បានស្នើឲ្យអង្គការក្រៅរដ្ឋាភិបាលពិចារណាលើករណីទាំងនេះ ព្រោះជាការបំពុលមួយ ដោយសារកម្ពុជាមិនមានករណីកូវីដ-១៩ ជាង៥០ថ្ងៃមកហើយ មុនពេលមានការរាតត្បាតឡើងវិញ នារយៈពេលប៉ុន្មានថ្ងៃចុងក្រោយនេះ។
សម្តេចបានបញ្ជាក់ឡើងវិញថា នេះមិនទាក់ទងនឹងសិទ្ធិបញ្ចេញមតិនោះទេ វាជារឿងមិនបានការ ដោយគ្រាន់តែជាការបំពុលបរិយាកាសតែប៉ុណ្ណោះ។ «បើធ្វើខុស មិនដាក់គុក ត្រូវធ្វើយ៉ាងម៉េច? »។ នេះជាការចោទសួររបស់សម្តេច ហ៊ុន សែន ដែលអះអាងពីការពង្រឹងការប្រឆាំងព័ត៌មានក្លែងក្លាយ។
ទាក់ទងនឹងវ៉ាក់សាំង សម្តេចបន្តអំពាវនាវឲ្យពលរដ្ឋនាំគ្នាទៅចាក់ ដោយបច្ចុប្បន្ន កម្ពុជាមានប្រមាណ១០,៤លានដូសក្នុងស្តុក ហើយ២០លានដូសទៀត នឹងមកដល់៕ © រក្សាសិទ្ធិដោយ thmeythmey.com