វៀតណាម បានរៀបចំពិព័រណ៌លំដាប់អន្តរជាតិលើការតាំងបង្ហាញរថយន្តទំនើបៗ ចន្លោះពីថ្ងៃទី២៩ ខែមិថុនា ដល់ថ្ងៃទី១ ខែកក្កដា កន្លងមក នៅក្រុងហូជីមិញ ដោយទាក់ទាញបានក្រុមហ៊ុនល្បីៗជាង១៥០ពី២១ប្រទេស និងដែនដី។ នេះបើតាមការផ្សាយរបស់ទីភ្នាក់ងារព័ត៌មាន VNA។
ពិព័រណ៌រយៈពេល៣ថ្ងៃនោះ មានទាំងការចូលរួមដោយផ្ទាល់ និងតាមរយៈវេទិកាឌីជីថល V-connect ដែលវាជាឱកាសដ៏សំខាន់របស់ក្រុមអ្នករៀបចំព្រឹត្តិការណ៍ ក៏ដូចជាក្រុមហ៊ុននានា ក្នុងការបង្ហាញពីបច្ចេកវិទ្យារបស់ខ្លួនលើឌីជីថលភាវូបនីយកម្ម និងការវិវត្តន៍ឧស្សាហកម្ម។
អ្នកស្រី Fliona Chiew អគ្គនាយិការងក្រុមហ៊ុន Messe Frankfurt ដែលទទួលបន្ទុករៀបចំព្រឹត្តិការណ៍ Automechanika Ho Chi Minh City (AMHCMC 2022) បានកត់សម្គាល់ពីការរីកចម្រើនផ្នែកឧស្សហកម្មយានយន្តនៅវៀតណាម ទាំងកំណើនការលក់ក្នុងប្រទេស ក៏ដូចជាការនាំចូល។
នៅក្នុងក្របខណ្ឌ AMHCHMC 2022 បណ្តាក្រុមហ៊ុនពីក្នុងតំបន់ រួមមាន ម៉ាឡេស៊ី កូរ៉េខាងត្បូង ថៃ និងតៃវ៉ាន់ (ចិន) ក៏មានឱកាសបង្ហាញពីផលិតផលដ៏សម្បូរបែបរបស់ខ្លួនផងដែរ ជាពិសេសបច្ចេកវិទ្យាចុងក្រោយក្នុងឧស្សាហកម្មយានយន្តរៀងៗខ្លួន។
សម្រាប់ម្ចាស់ផ្ទះវៀតណាម បណ្តាសមាគម សហគ្រាស និងក្រុមហ៊ុនពាក់ព័ន្ធនានា បានបង្ហាញផលិតផលគ្រប់ផ្នែកមានទាំងរថយន្តទំនើបៗ គ្រឿងបន្លាស់ សេវាកម្មជួសជុល កង់រថយន្ត សេវាថែទាំ និងការបង្ហាញផ្សេងៗ។
ពិព័រណ៌ AMHCHMC 2022 ទាក់ទាញក្រុមហ៊ុនល្បីៗជាង១៥០ពី២១ប្រទេស និងដែនដី។ ជាមួយគ្នានេះ អ្នកទស្សនាផ្ទាល់មានជិត១ម៉ឺននាក់ ពី៤៧ប្រទេស/ដែនដី ក្នុងនោះ៨២ភាគរយ ជាភ្ញៀវក្នុងស្រុក។
អ្នកទស្សនាពិព័រណ៌យានយន្តនៅហូជីមិញច្រើនជាងគេ មានមកពីអូស្ត្រាលី, ចិន, ជប៉ុន, កូរ៉េខាងត្បូង, ម៉ាឡេស៊ី, សិង្ហបុរី, តៃវ៉ាន់, ថៃ, សហរដ្ឋអាម៉េរិក។ រីឯពលរដ្ឋក្នុងស្រុកមួយចំនួនធំទៅពីខេត្ត Binh Duong, Can Tho, Da Nang, Hai Phong, Long An និងអ្នកនៅហូជីមិញផ្ទាល់៕