«បងប្អូនសុំចូលមកបង់ពន្ធ តែមិនបាច់ដូរចង្កូតទេ» ។ នេះជាការលើកឡើងរបស់សម្ដេច ហ៊ុន សែន ដែលបានបន្ថែមថា ការសម្រេចឱ្យអ្នកប្រើប្រាស់រថយន្តចង្កូតស្ដាំ ទៅបង់ពន្ធ ដោយមិនចាំបាច់ប្ដូរចង្កូតនេះ ដើម្បីសម្រួលដល់ការលំបាកពួកគេ។ ប៉ុន្តែសម្ដេច បានបញ្ជាក់ថា បើពលរដ្ឋណា មានលទ្ធភាពចង់ប្ដូរចង្កូតស្ដាំទៅឆ្វេងវិញ ក៏វាជារឿងត្រឹមត្រូវដែរ។
 

ជុំវិញបញ្ហានេះ សម្ដេច ហ៊ុន សែន បានសង្កត់ធ្ងន់ថា សម្ដេចអនុញ្ញាតឱ្យធ្វើបែបនេះ សម្រាប់តែរថយន្តចង្កូតស្ដាំដែលកំពុងបម្រើការនៅក្នុងស្រុក នាបច្ចុប្បន្ន គិតត្រឹមថ្ងៃទី៦ កក្កដា ២០២២នេះប៉ុណ្ណោះ ។ ត្រង់ន័យនេះ ប្រមុខរដ្ឋាភិបាល បានចេញបញ្ជាដាត់ណាត់ថា ហាមនាំចូលរថយន្តចង្កូតស្តាំមកកម្ពុជាទៀត ។ ចំណែករថយន្តចង្កូតស្ដាំដែលនាំចូលមកកម្ពុជា ក្រោយសម្ដេច ប្រកាសនេះ នឹងត្រូវចាប់តែម្ដង។ 
 

«អត់ឱ្យ(រថយន្តចង្កូតស្តាំ) ចូលមកទេ ប៉ុន្តែបើចូលមកហើយ ចាប់យកតែម្ដង ឱ្យបង់ពន្ធក៏មិនឱ្យបង់ពន្ធ កែចង្កូតក៏មិនឱ្យកែចង្កូត គឺចាប់យកតែម្ដង» ។ នេះបើតាមប្រមុខរដ្ឋាភិបាល។

រថយន្តចង្កូតស្តាំ កក់ពន្ធអាករ ជាង៦ពាន់គ្រឿង និង៤ពាន់គ្រឿង បានកែចង្កូតហើយ ខណៈជាង២ពាន់គ្រឿងទៀត មិនទាន់បានកែចង្កូតនោះទេ។ នេះបើតាមសម្ដេច ហ៊ុន សែន៕