មន្ត្រីនៅចក្រភពអង់គ្លេស កាលពីពេលថ្មីៗកន្លងមកនេះ បានលើកពីករណីឃាត់ខ្លួនបុរសវ័យ១០០ឆ្នាំម្នាក់ពីបទបើកបរទាំងស្រវឹង។ គាត់ស្ថិតក្នុងចំណោមអ្នកបើកបរ៥ដែលមានអាយុលើស៩០ឆ្នាំ ត្រូវបានសមត្ថកិច្ចចាប់ខ្លួនពីបទបើកបរហួសល្បឿនកំណត់។ នេះបើតាមការផ្សាយរបស់សារព័ត៌មាន Wales Online។
ទិន្នន័យថ្មីរបស់ភ្នាក់ងារអាជ្ញាបណ្ណអ្នកបើកបរ និងយានយន្ត (DVLA) ក្រោមកិច្ចសហការជាមួយក្រុមជួលរថយន្តដ៏ធំនៅចក្រភពអង់គ្លេស Select Car Leasing បានបង្ហាញពីតួលេខដ៏គួរឲ្យព្រួយបារម្ភទាក់ទងនឹងការបើកបរទាំងក្នុងស្ថានភាពស្រវឹង ជាពិសេសក្នុងចំណោមមនុស្សវ័យចំណាស់។
លោក Graham Conway នាយកគ្រប់គ្រងក្រុមហ៊ុន Select Car Leasing បានលើកឡើងថា គ្មានអ្វីដែលអាថ៌កំបាំងនោះឡើយ ដែលមនុស្សវ័យចំណាស់ មានការមើលឃើញមិនសូវច្បាស់ និងមានប្រតិកម្មយឺតជាងក្មេង ប៉ុន្តែរាល់អ្នកបើកបរត្រូវតែមានទំនួលខុសត្រូវលើការបញ្ជាយានយន្ត ដើម្បីកាត់បន្ថយគ្រោះថ្នាក់។
ទិន្នន័យបង្ហាញថា គ្រោះថ្នាក់ដែលកើតឡើងដោយសារការបើកបរក្នុងស្ថានភាពស្រវឹងនៅទូទាំងចក្រភពអង់គ្លេសមានការកើនឡើងខ្ពស់ ដោយក្នុងនោះបុរសជាង១៥ម៉ឺននាក់ និងស្ត្រីជាង៣៨០០០នាក់ ដោយអ្នកខ្លះព្យាយាម និងបង្កើនល្បឿនហួសដែនកំណត់។
ក្នុងចំណោមនោះ អ្នកបើកករក្នុងស្ថានភាពស្រវឹងជិត៥០០នាក់ មានអាយុចន្លោះពី៨០ ទៅ៨៩ឆ្នាំ ជិត៣៥០០នាក់ចន្លោះពី៧០ទៅ៧៩ឆ្នាំ ជាង១១០០០នាក់ អាយុចន្លោះពី៦០ទៅ៦៩ឆ្នាំ។ អ្នកបើកបរ៥នាក់មានអាយុលើស៩០ឆ្នាំ ហើយបុរសម្នាក់ឈានដល់អាយុ១០០ឆ្នាំ ដែលជាប់កំណត់ត្រា អ្នកបើកបរក្នុងស្ថានភាពស្រវឹងដែលមានវ័យចំណាស់ជាងគេនៅចក្រភពអង់គ្លេស។ ចំណែកស្ត្រី មានម្នាក់អាយុដល់ទៅ៩៥ឆ្នាំផងដែរ។
កម្រិតជាតិអាល់កុលកំណត់សម្រាប់ការបើកបរនៅអង់គ្លេស វេលស៍ និងអៀរឡង់ខាងជើង គឺ៨០មីល្លីក្រាមនៃជាតិអាល់កុលក្នុង១០០មីល្លីលីត្រឈាម ខណៈស្កុតឡែនកំណត់ត្រឹម៥០មីល្លីក្រាមក្នុង១០០មីល្លីលីត្រឈាម។
របាយការណ៍របស់នាយកដ្ឋានដឹកជញ្ជូនចក្រភពអង់គ្លេស (DfT) បង្ហាញថា មនុស្សជាង៦០០០នាក់នៅឆ្នាំ២០២០ បានស្លាប់ ឬរងរបួសដោយសារតែអ្នកបើកបរស្ថិតក្នុងស្ថានភាពស្រវឹង ដោយមានកំណើនខ្ពស់បំផុតសម្រាប់គ្រោះថ្នាក់នៅលើផ្លូវថ្នល់។
បើតាមលោក Conway ករណីផឹកគ្រឿងស្រវឹងភាគច្រើនកើនឡើងនាអំឡុងនៃការរាលដាលកូវីដ-១៩ ដោយមនុស្សពិបាកជួបជុំគ្រួសារមិត្តភក្តិ ហើយបានជាតិអាល់កុលដោះស្រាយភាពតប់ប្រមល់។ ទោះបីជាយ៉ាងណាក៏ដោយ លោកប្រឆាំងដាច់ខាតចំពោះទង្វើបែបនេះ វានឹងបង្កគ្រោះថ្នាក់កាន់តែធ្ងន់ធ្ងរនាពេលខាងមុខ។
Wales Online បានបញ្ជាក់ថា គ្មានការកំណត់អាយុសម្រាប់ការកាន់បណ្ណបើកបរនោះឡើយនៅចក្រភពអង់គ្លេស ប៉ុន្តែសម្រាប់អ្នកមានអាយុចាប់ពី៧០ឆ្នាំឡើងទៅ ត្រូវតែធ្វើសុពលភាពបណ្ណរៀងរាល់៣ឆ្នាំម្តង៕